Nvidia Corp.-un səhmləri dəyərini artırmağa davam edir və cümə axşamı ticarət nəticələrinə görə, mikroçip istehsalçısının kapitalizasiyası yaxın gələcəkdə tarixdə ən yüksək səviyyəyə çatacaq.
Ötən gün ticarət zamanı Nvidia-nın qiymətləri 2,4% bahalaşmş və şirkətin bazar dəyəri 3,92 trilyon dolları keçmişdir. Sessiyanın sonunda isə bu göstərici 3,89 trilyon dollar olub. Ticarət bağlanışı üzrə ən yüksək rekord 2024-cü ilin dekabrında Apple-a məxsus olub və 3,915 trilyon dollar təşkil edib.
Hazırda Nvidia ABŞ-ın fond birjasında ən bahalı şirkət hesab olunur. İkinci yeri Microsoft Corp. (3,7 trilyon dollar), üçüncü yeri isə Apple (3,19 trilyon dollar) tutur.
Nvidia-nın kapitalizasiyası bu il ərzində təxminən 20% artıb, bu da süni intellekt (Sİ) texnologiyalarının işləməsi üçün istifadə olunan çiplərə yüksək tələbatla əlaqəlidir. Son dörd ildə şirkətin bazar dəyəri təxminən səkkiz dəfə artıb və indi bu, Birləşmiş Krallığın bütün fond bazarından daha yüksəkdir.