Süni intellekt çipləri bazarının lideri “Nvidia Corp.” tarixinin ən güclü maliyyə hesabatlarından birini açıqlamasına baxmayaraq, səhmləri 5,5% dəyər itirib. Bu paradoksal vəziyyət bazarda süni intellekt “balonu” ilə bağlı narahatlıqları yenidən gündəmə gətirib.
Şirkətin keçən rüb üzrə mənfəəti təxminən iki dəfə artaraq analitiklərin gözləntilərini üstələyib, gəlir isə rekord həddə çatıb. Bundan başqa, “Nvidia”nın cari rüb üzrə proqnozu da bazar proqnozlarından yüksək olub. Lakin güclü maliyyə göstəriciləri investorları qane etməyib.
Bazar ekspertlərinin fikrincə, investorlar süni intellekt sektorunda şişirdilmiş qiymətləndirmələrdən və mümkən “balon” effektindən ehtiyatlanırlar. Bu narahatlıq nəticəsində “Nvidia” ilə yanaşı, digər çip istehsalçılarının da səhmləri ucuzlaşıb. “Broadcom Inc.” 3,2%, “Lam Research Corp.” 4,2%, “Western Digital Corp.” 3%, “Applied Materials Inc.” isə 4,9% dəyər itirib.
Ümumi bazarda qarışıq mənzərə müşahidə olunub:
· “Dow Jones” Industrial Average cüzi artımla (+0,03%) 49 499,2 bənd səviyyəsində qərarlaşıb
· Geniş bazarı əks etdirən “S&P 500” 0,54% azalaraq 6 908,86 bənd olub
· Yüksək texnologiya şirkətlərinin ağırlıq təşkil etdiyi “Nasdaq” isə 1,18% düşərək 22 878,38 bənd səviyyəsinə enib
Analitiklər qeyd edirlər ki, süni intellekt sektoruna maraq azalmasa da, investorların risk qiymətləndirməsi daha ehtiyatlı strategiyaya keçib.