OPEC-in neft bazarları üzrə aylıq hesabatı açıqlanıb. Hesabata görə, OPEC 2025 və 2026-cı illər üçün dünya neftə tələbatın artım proqnozlarını dəyişməz saxladı.
GDP xəbər verir ki,bununla yanaşı, OPEC+ ölkələri aprel ayında neft hasilatını 27 min barel/gün azaldaraq, ümumi hasilat səviyyəsini müqavilədə nəzərdə tutulandan 68 min barel/gün aşağı səviyyədə qeyd etdilər.
Xüsusi diqqət çəkən məqam isə neft hasilatını könüllü olaraq azaldan səkkiz OPEC+ ölkəsinin (Səudiyyə Ərəbistanı, Rusiya, İraq, BƏƏ, Qazaxıstan, Küveyt, Əlcəzair və Oman) aprel ayında planı 475 min barel/gün üstələməsi oldu. Bu kəskin artımın əsas səbəbi kimi Qazaxıstanın nəzərdə tutulandan çox neft hasil etməsi göstərildi.
Hesabatda qeyd olunur ki, OPEC-in dünya neft tələbatına dair proqnozlarını dəyişməz saxlaması, qlobal iqtisadiyyatda mövcud olan qeyri-müəyyənliyə baxmayaraq, neft bazarının nisbətən sabit qalacağı gözləntisini əks etdirir. Lakin bəzi OPEC+ üzv ölkələrinin, xüsusilə Qazaxıstanın hasilat hədəflərini əhəmiyyətli dərəcədə üstələməsi, qrup daxilində uyğunsuzluq yaratdığı üçün narahatlıq doğurur. Bu vəziyyət neft qiymətlərinin tarazlığını qoruyub saxlamaq üçün qrupun ümumi səylərini çətinləşdirə bilər.