“PAŞA Bank” ASC İdarə Heyəti sədrinin müavini Bəhruz Nağıyev GDP-yə verdiyi eksklüziv müsahibəsində bildirib ki, Maliyyə Nazirliyi tərəfindən keçirilən depozit hərraclarının məqsədi bank sektorunda likvidlik problemini aradan qaldırmaq deyil.
Nağıyev qeyd edib ki, nə “PAŞA Bank”, nə də bütövlükdə ölkənin bank sektorunda likvidliklə bağlı hər hansı problem mövcud deyil:
“PAŞA Bankın hazırda hər hansı bir likvidlik problemi yoxdur. Baxmayaraq ki, tələb 30% səviyyəsindədir, bizim ani likvidlik əmsalımız bu tələbdən 2-3 dəfə yüksəkdir. LCR (Likvidliyin Örtücülük Əmsalı) əmsalı isə 200%-dən yuxarıdır. Bizim heç bir likvidlik çətinliyimiz yoxdur. Nəinki bizim, həm də bütöv bank sektoru adından danışmaq istərdim – bank sektorunun da Mərkəzi Bank qarşısında qaldırdığı heç bir likvidlik problemi yoxdur.”
Bəhruz Nağıyev əlavə edib ki, bazarda müşahidə edilən faiz və qiymət dəyişiklikləri likvidlik çatışmazlığı ilə bağlı deyil:
“Mümkün olan çətinliklər qiymətlərin və faiz xərclərinin dəyişməsi ilə əlaqəli ola bilər, lakin likvidliklə bağlı hər hansı bir problemə indiyədək rast gəlinməyib.”
Depozit faizlərinin artımı – yeni tələblərin nəticəsi
PAŞA Bank rəsmisi ötən ilin son rübündən etibarən depozit faizlərinin artmasının da likvidlik çatışmazlığının göstəricisi olmadığını vurğulayıb. Onun sözlərinə görə, bu artım tənzimləyici tərəfindən tətbiq edilən yeni likvidlik və məcburi ehtiyat tələbləri ilə bağlıdır:
“Sadəcə olaraq, likvidlik əmsalı tələbləri dəyişib. Ani likvidlik əmsalı, LCR ilə bağlı yeni tələblər, həmçinin məcburi ehtiyat normalarındakı dəyişikliklər bankın cəlb etdiyi vəsaitin əlçatanlığını azaldır. Əvvəllər 100 manat cəlb edən bank indi 200 manat cəlb etməyə məcbur olur və bu da bazarda əlavə tələb yaradır. Bazar isə bu vəziyyətə daha yüksək faizlə reaksiya verir.”
Nağıyev vurğulayıb ki, bu vəziyyət bazarda likvidlik problemi deyil, sadəcə olaraq tənzimləyici dəyişikliklərin yaratdığı yeni reallıqdır:
“Bu, sadəcə olaraq yeni likvidlik əmsallarının formalaşdırdığı mühitdir və PAŞA Bank olaraq biz bu şəraitə artıq tam uyğunlaşmışıq.”
Müəllif: Aynur Qəniyeva