PAŞA Bank OJSC bu gün fəaliyyətinin 18 illiyini qeyd edir. Bankın İdarə heyətinin sədri Cavid Quliyev yubileyə həsr olunmuş açıqlamasında qeyd edib ki, bu illər ərzində PAŞA Bank minlərlə müştərinin etimadını qazanaraq Azərbaycanda və regionda etibarlı maliyyə tərəfdaşına çevrilib.
GDP -nin məlumatına görə, Quliyev vurğulayıb ki, uğur təkcə rəqəmlərlə ölçülmür: “Bu, bizim dəyərlərimizin, yaratdığımız etibarın və insan amilinə verdiyimiz əhəmiyyətin nəticəsidir. Bankda keçirdiyim 10 il ərzində dəyişikliklər, inkişaflar, çətinliklər və qələbələr gördüm – hər biri həm böyük məsuliyyət, həm də ilham mənbəyi olub.”
Açıqlamada qeyd olunub ki, PAŞA Bankın əsas gücü onun əməkdaşları, müştəriləri və tərəfdaşlarıdır: “Ən çətin dövrlərdə belə irəliləyə bilməyimizin səbəbi birlikdə yaratdığımız dəyərdir. Biz hər zaman müştərilərin ehtiyaclarını anlayan, dinləyən və onlara uyğun həllər təqdim edən bank olmaq üçün çalışmışıq.”
Cavid Quliyev sonda bankın inkişafında rol oynayan hər kəsə təşəkkür edərək, “Daha böyük hədəflərə doğru birlikdə addımlayırıq”- deyə bildirmişdir.