ABŞ Federal Ehtiyat Sisteminin (FED) sədri Cerom Pauell bildirib ki, inflyasiya hələ də yüksək səviyyədə qalır, əmək bazarı isə zəifləyir və bu səbəbdən mərkəzi bankın növbəti siyasət addımı üçün “risksiz yol” mövcud deyil.
“Bu, çətin vəziyyətdir,” – Pauell çərşənbə axşamı Rod-Aylenddəki çıxışında deyib. O, FED-in maksimum məşğulluq və qiymət sabitliyi üzrə ikili hədəfləri arasında balans saxlamalı olduğunu vurğulayıb. “İkitərəfli risklər o deməkdir ki, risksiz yol yoxdur,” – deyə o əlavə edib.
Pauell çıxışında keçən həftə FED-in uçot dərəcəsini 25 baza bəndi azaltması və ilin sonuna qədər daha iki dəfə 25 baza bəndlik azaldılmanın mümkünlüyü ilə bağlı açıqlamalarını təkrarlayıb.
FED rəhbəri çətin vəziyyətdədir: bir tərəfdən qurum daxilində gələcək siyasət kursu ilə bağlı fikir ayrılığı var, digər tərəfdən isə Ağ Ev faizlərin daha da azaldılması üçün güclü təzyiq göstərir.
FED-in yeni üzvü, qubernator Stiven Miran bazar ertəsi çıxışında bildirib ki, uçot dərəcəsi hazırkı 4% – 4,25% aralığından təxminən 2 faiz bəndi aşağı olmalıdır. Onun sözlərinə görə, hazırkı dərəcələr həddindən artıq məhduddur və bu, işdən çıxarılmaların artmasına və işsizliyin dərinləşməsinə səbəb ola bilər. Miran ötən həftə FED-in 25 baza bəndlik azaldılmasına qarşı çıxan yeganə üzv olub və daha böyük – 50 baza bəndlik azaldılmanı dəstəkləyib.
Əmək bazarındakı zəifləmə əlamətləri son qərara təsir etsə də, bir çox FED rəsmisi əlavə faiz azaldılmalarında ehtiyatlı davranmağa çağırır. Onların fikrincə, inflyasiya hələ də FED-in 2%-lik hədəfindən yüksəkdir. Sent-Luis FED-in prezidenti Alberto Musalem bildirib ki, o, işsizliyin artması riskinə qarşı “ehtiyat tədbiri” kimi faiz azaldılmasını dəstəkləyib, amma əlavə azaldılmaların inflyasiyanı artırmaq ehtimalını da vurğulayıb.
Atlanta FED-in prezidenti Rafael Bostik isə Wall Street Journal-a müsahibəsində inflyasiya ilə bağlı narahatlıqların oktyabrda əlavə azaldılmanı dəstəkləməsinə mane ola biləcəyini deyib.
FED-in üstünlük verdiyi inflyasiya göstəricisi – İstehlak Xərcləri (PCE) indeksi hazırda 2,9% təşkil edir. Avqust ayına dair yeni göstərici isə cümə günü açıqlanacaq.
Pauell yenidən ABŞ prezidenti Donald Trampın açıqlamalarına münasibət bildirməyib. Tramp dəfələrlə daha aşağı faizlərin tərəfdarı olduğunu bəyan edib və Pauelli “dərəcələri azaltmaqda gecikməkdə” tənqid edib. Lakin FED sədri bildirib ki, qurum tariflərin inflyasiyaya təsirini diqqətlə izləyir və uzun müddət əlavə dəyişiklik üçün əsas görməyib.
“Bizim mövqeyimizdən məsuliyyətli olan addım izləmək və gözləmək idi,” – Pauell çıxışdan sonra sual-cavab sessiyasında deyib. – “Bizim işimiz ondan ibarətdir ki, inflyasiya ilə bağlı səhvə yol verməyək.”
O, həmçinin FED-in siyasətində siyasi motivlərin olduğunu iddia edənlərə də cavab verib:
“Bizi siyasi olmaqda ittiham edənlərin çoxu sadəcə ucuz populizmə əl atır,” – deyə Pauell qeyd edib.