Qaz İxracatçısı Ölkələr Forumu (GECF) və Neft İxracatçısı Ölkələr Təşkilatı (OPEC) Bakıda COP29 çərçivəsində üçüncü koordinasiya görüşünü keçirib
GDP xıəbər verir ki,2024-cü il noyabrın 19-da Bakıda keçirilən görüşdə iki təşkilatın iqlim dəyişikliyi ilə mübarizə məsələlərində əməkdaşlığının əhəmiyyəti müzakirə edilib.
“İki təşkilatın iqlim dəyişikliyi və enerji təhlükəsizliyi ilə bağlı problemlərin həllində qarşılıqlı əlaqəsinin vacibliyi qeyd olunub”, – məlumatda bildirilir.
GECF-in rəhbəri Məhəmməd Hamel deyib: “GECF və OPEC həmfikir hökumətlərarası təşkilatlardır və üzvlərimizə COP29 çərçivəsində danışıqların əsas istiqamətləri üzrə fikir və təcrübə mübadiləsi platforması təqdim etmək çox önəmlidir”.
OPEC-in baş katibi Heysəm əl-Qeys də iki təşkilat arasında əməkdaşlığın əhəmiyyətini təsdiqləyərək bildirib ki, bu görüşlər birgə fəaliyyətin əlaqələndirilməsinə və səmərəliliyinin artırılmasına imkan verir.
Tərəflər Paris İqlim Sazişinin əsas məsələlərinin, xüsusilə inkişaf etməkdə olan ölkələr üçün aktual olan mövzuların – iqlim maliyyələşdirilməsi, təsirlərinin azaldılması, uyğunlaşma, itkilər və zərər, ədalətli, realist və bərabərhüquqlu enerji keçidi, texnologiyaların ötürülməsi və potensialın artırılması məsələlərinin irəli çəkilməsinin vacibliyini qəbul ediblər.
Nümayəndə heyətləri COP29-dan ədalətli, inklüziv, realist və tarazlaşdırılmış nəticənin əldə edilməsinin zəruriliyini vurğulayıblar ki, bu, iqlim dəyişikliyi problemini həll etməyə, eyni zamanda davamlı inkişafı, enerji təhlükəsizliyini və əlçatanlığı təmin etməyə imkan verəcək.
Tərəflər GECF və OPEC-in üzv ölkələri arasında gələcək əməkdaşlığın iqlim danışıqlarında səmərəli iştirak və ümumi problemlərin həlli üçün əhəmiyyətini təsdiq ediblər.
Görüşün yekununda tərəflər enerji, iqlim və inkişafla bağlı mürəkkəb məsələlərin həlli məqsədilə GECF və OPEC arasında əlaqələrin, o cümlədən texniki səviyyədə möhkəmləndirilməsi barədə razılığa gəliblər.