Qızılın qiymətləri qlobal maliyyə sabitliyi və ABŞ-ın ticarət tariflərinə dair davamlı narahatlıqlar fonunda bir qədər yüksələrək rekord həddə çatıb.
GDP xəbər verir ki, lakin sarı metalın artımı dolların dəyər qazanmasının bərpası ilə məhdudlaşıb. Həftə ərzində dəyər itirən dollar, dünya üzrə dövlət istiqrazlarının kütləvi satışından sonra ABŞ bazarlarına yönələn investorlar hesabına möhkəmlənib.
Bununla belə, qızıl və digər qiymətli və sənaye metalları həftənin əvvəlindən etibarən mühüm artımlar nümayiş etdirib.Sənaye metallarından London mis fyuçersləri Çində tələbin artacağına dair nikbin gözləntilər fonunda mart ayından bəri ilk dəfə olaraq qısa müddətə 10 min dollar/ton həddini aşıb.
Spot qızıl 3 534,61 dollar/unsiya səviyyəsində sabitləşib, dekabr fyuçersləri isə 0,3% artaraq 3 601,15 dollar/unsiya təşkil edib. Sessiyanın əvvəlində spot qızıl tarixinin ən yüksək göstəricisi olan 3 547,09 dollar/unsiyanı da görüb. Qızıl fiskal risklər və tarif qeyri-müəyyənliyi fonunda bahalaşır. Bülə ki, qiymətli metala bu həftəki əsas dəstək ABŞ apellyasiya məhkəməsinin Prezident Donald Trampın tətbiq etdiyi ticarət tariflərinin əksəriyyətini qanunsuz sayan qərarından sonra gəlib. Qərara əsasən, tariflər yalnız oktyabrın ortalarına qədər qüvvədə qala bilər.Tramp isə hökmü sərt şəkildə tənqid edərək Ali Məhkəməyə müraciət edəcəyini bildirib. Bununla belə, növbəti məhkəmə qərarlarının əleyhinə olması Vaşinqtonu son ticarət razılaşmalarını yenidən müzakirə etməyə məcbur edə bilər ki, bu da qlobal ticarətdə daha çox qeyri-sabitlik vəd edir. İnkişaf etmiş ölkələrdə artan borc səviyyələrinə dair narahatlıqlar çərşənbə axşamı qlobal istiqraz gəlirliliyini yüksəldib. İstiqraz bazarındakı satışlar dolların möhkəmlənməsinə səbəb olub ki, bu da qızılın qiymətinin irəliləyişini müəyyən qədər məhdudlaşdırıb.
Dollar bu həftənin sonlarında ciddi sınaqla üz-üzə qalacaq – avqust ayı üzrə kənd təsərrüfatı sahəsi istisna olmaqla məşğulluq (nonfarm payrolls) göstəriciləri açıqlanacaq. Bu rəqəmlər ABŞ Federal Ehtiyat Sisteminin (Fed) faiz dərəcələrini endirmək planlarında mühüm rol oynayacaq.
CME FedWatch alətinə görə, fyuçers bazarında investorlar bu ay Fed-in faizləri 25 baza bəndi endirməsinə 90%-dən çox ehtimal verirlər. Son həftələrdə artan faiz endirimi gözləntiləri də qiymətli metal qiymətlərini yüksəldən əsas amillərdən olub.
.