Bakı Fond Birjası (BFB) xarici broker və investisiya şirkətlərinin fiziki olaraq Azərbaycanda olmadan birjada əməliyyatlar aparması üçün “məsafədən üzvlük” mexanizmini tətbiq etməyi planlaşdırır. Bununla bağlı qanunvericilikdə dəyişikliklər tələb oluna biləcəyi bildirilir.
GDP xəbər verir ki, BFB İdarə Heyətinin sədri Ruslan Xəlilov açıqlamasında qeyd edib ki, hazırda qüvvədə olan qaydalara görə, xarici brokerlər BFB-də əməliyyat aparmaq üçün birjaya üzv olmalıdırlar. Lakin beynəlxalq təcrübədə “tabadul” platformaları vasitəsilə brokerlər fiziki olaraq iştirak etmədən digər birjalarda fəaliyyət göstərə bilirlər.
“Xarici brokerlərin BFB-yə məsafədən qoşulması üçün cari qanunvericiliyimizdə müəyyən dəyişikliklər edilməsi zəruri ola bilər,” – deyə Xəlilov vurğulayıb.
BFB rəhbərliyinin açıqlamasına görə, bu təşəbbüs birjada siyahıya alınmış şirkətlərin səhmlərinin xarici investorlar tərəfindən daha geniş şəkildə alınıb-satılmasına və ticarət dövriyyəsinin artırılmasına xidmət edəcək.
Tənzimləyici orqanın(Mərkəzi Bankın) bu istiqamətdə lazımi qaydaları dəyişməsindən, cümlədən qanunvericilikdə tələb olunan dəyişikliklərin həyata keçirilməsindən sonra “məsafədən üzvlük” mexanizmi üzrə pilot testlərə başlana biləcək.
“Bütün ekosistem – qanunvericilik, texnologiya və nəzarət mexanizmləri bu tələblərə uyğunlaşdırılmalıdır. Bunlar qısa müddətdə həll oluna biləcək məsələlər deyil,” – deyə Xəlilov açıqlayıb.
Qeyd edək ki, “Tabadul” – müxtəlif ölkələrin fond birjaları arasında qiymətli kağızların qarşılıqlı ticarətini təmin edən beynəlxalq birja əməkdaşlıq sistemidir. Bu sistem bir ölkənin investorlarının digər ölkə birjasında siyahıya alınmış səhmləri öz yerli birjası vasitəsilə alıb-satması imkanı yaradır.
Müəllif: Aynur Qəniyeva