Ötən həftə ərzində dünya birjalarında qızıl qiymətləri bütün zamanların ən yüksək həddinə çatıb və qızılın neftə nisbəti 1-dən 30-a qalxıb. Bu nisbətin kəskin artımı dünya iqtisadiyyatında böhranın göstəricilərindən biri kimi qiymətləndirlir. Hətta cümə günü Comex birjasında qızıl fyuçers kotirovkaları 1% artaraq 1 troya unsiyası üçün 2506,2 dollara satılıb. Dünya bazarında qızılın bahalaşması təbii ki, ölkəmizdə də qızılın və birbaşa qızıl-ziynət əşyalarının qiymətinə də təsirsiz ötüşmür.
Azərbaycanın qızıl bazarında qiymətin formalşaması və bahalaşmanın ölkəmizə təsirlərini GDP-yə Azərbaycan Zərgərlər Assosiasiyasının sədri Toğrul Abbasquliyev şərh edib.
O bildirib : “Son 6 il ərzində qızılın qiymətində əhəmiyyətli bir artım müşahidə olunmaqdadır. 2019-cu ilə qədər 1 qram xam qızılın qiyməti 40-42 ABŞ dolları arasında sabit qalmışdı. Lakin, 2019-cu ildən başlayaraq xam qızılın qiymətində kəskin bir artım baş verdi və 1 qram 999 əyarlı xam qızılın qiyməti 60 ABŞ dollarına qədər yüksəldi. Hətta 2020-ci ilin əvvəlində bu qiymət 63 ABŞ dollarına çatdı.”
Onun sözlərinə görə son 4 il ərzində isə xam qızılın 1 qramının qiyməti 60-65 dollar arasında dəyişib. 2023-cü ilin payız aylarından başlayaraq qızılın qiyməti 65-66 ABŞ dollarından da yuxarı qalxmağa davam etdi. Hal-hazırda isə 1 qram xam qızılın qiyməti artıq 79 ABŞ dollarıdır və bu artım dinamikasının gələcəkdə də davam edəcəyi gözlənilir.
Toğrul Abbasquliyev,bu artımın təbii olaraq hazır zərgərlik məmulatlarının da qiymətlərinə təsir etdiyini qeyd edərək diqqətə çatdırıb ki, zərgərlik məmulatlarının qiyməti əsasən üç amil əsasında formalaşır: ” Xam qızılın maya dəyəri, qiymətli daşların dəyəri və işçilik əməkhaqqı. İşçilik üçün hesablanan əmək haqqı demək olar ki, sabit qalıb və son 10-15 il ərzində stabil gəlir marjası müşahidə edilir. İstehsalçılar tərəfindən bu qiymət sadə işçilikdə 1 qram xam qızılın işçilik dəyəri 5-7 ABŞ dolları arasında dəyişir, daha mürəkkəb və fərqli dizaynlı zərgərlik əşyalarının hazırlanmasında isə işçilik dəyəri 10-15 hətta 20 dollar da ola bilər.”
Assosiasiyasının sədri “Azərbaycanda xam qızılın qiyməti artdıqca, təbii ki, zərgərlik məmulatlarının da qiyməti artır. Xam qızıl ucuzlaşdıqda isə məmulatların qiymətində eniş müşahidə edilir. Bundan əlavə, qiymətli daşların da son bir neçə il ərzində 50-60% bahalaşması, zərgərlik məmulatlarının qiymətinə müəyyən dərəcədə təsir göstərir.”-deyə əlavə edib.