Azərbaycan iqtisadi diversifikasiya və innovasiya yönümlü siyasət sayəsində yüksək gəlirli ölkələr sırasına keçməyə hazırdır.
Bunu Prezident Administrasiyasının (PA) İqtisadi məsələlər və innovativ inkişaf siyasəti şöbəsinin müdiri Şahmar Mövsümov Dünya Bankının 2024-cü il üzrə “Dünyanın İnkişafı haqqında Hesabatı”nın (World Development Report – WDR) Bakıda yüksək səviyyəli təqdimat tədbirində bildirib.
Onun sözlərinə görə, 1990-cı illərdən bəri cəmi dörd orta gəlirli ölkə yüksək gəlirli ölkələr qrupuna keçid edib və Azərbaycan da bu prosesə hazırdır: “Bu, asan olmayacaq, lakin biz buna hazırıq. Bunun üçün iqtisadiyyatın şaxələndirilməsi əsas şərtdir. Əks halda, lider mövqeləri saxlamaq çətin olacaq”.
Ş.Mövsümov qeyd edib ki, Azərbaycan innovasiyalara yönəlmək üçün tələb olunan infrastruktur və bazaya malikdir: “Biz bu potensial əsasında sürətli inkişaf edə bilərik. Hazırda dünya ciddi çağırışlarla üz-üzədir, lakin Azərbaycandakı güclü rəhbərlik və Dünya Bankı kimi tərəfdaşlarla əməkdaşlıq bizə irəliyə doğru sürətli addımlar atmağa imkan verir. İnnovasiya uzunmüddətli iqtisadi artımın təmin edilməsi üçün strateji əhəmiyyət daşıyır. Bu baxımdan, startapların və sahibkarlığın dəstəklənməsi vacibdir”.
Mənbə: Report