İsrailin “Globes” nəşri bildirib ki, Azərbaycan Respublikasının Dövlət Neft Şirkəti (SOCAR) İsrailin ən böyük qaz yataqlarından biri olan Tamarda 10% payın alınması ilə bağlı razılaşmanı rəsmən bağlayıb.
Nəşr qeyd edib: “SOCAR-ə Tamarda 10% pay qazandıracaq bu müqavilənin dəyəri təxminən 1,25 milyard ABŞ dollarıdır.”
SOCAR, İsrailli milyarder Aaron Q. Frenkelin nəzarətində olan iki şirkətdə – “Union Energy” və “Tamar Petroleum”da paylar alıb.
SOCAR, Tamardakı ümumi 10% payın 7%-ni “Union Energy”dəki 48,3% pay, 3%-nü isə Tel-Əviv birjasında siyahıya alınmış “Tamar Petroleum”dakı 17,9% pay vasitəsilə əldə edəcək.
Hayfadan 90 km məsafədə yerləşən Tamar, Aralıq dənizinin ən böyük qaz yataqlarındandır. O, yanvar 2009-cu ildə kəşf edilib və İsrailin əsas qaz mənbələrindən biridir. Müstəqil ehtiyat qiymətləndirmə şirkəti NSAI-yə görə, yatağın təxmini təbii qaz ehtiyatı 13,73 trilyon kub fut (389 milyard kub metr) təşkil edir.
SOCAR-ın məlumatlarına görə, Tamar yatağı 2013-cü ildən altı sualtı hasilat quyusundan qaz istehsal edir. Yatağın inkişafı ilə bağlı cari saziş 2038-ci ilədək qüvvədədir və 2047-ci ilədək uzadıla bilər. İllik qaz istehsalı 10 milyard kub metrdir. Layihənin genişləndirilməsi və gələn üç il ərzində yeni quyuların qazılması planları illik istehsalı təxminən ildə 15 milyard kub metrə qədər artırmalıdır. Bərpa oluna bilən qaz ehtiyatları 286 milyard kub metr təşkil edir.
SOCAR, Aaron Frenkelin tam nəzarətində olan “Union Energy” ilə Tamar layihəsində 10% payın alınması ilə bağlı razılaşmanı 31 yanvar 2025-ci ildə imzalayıb.
Açıq mənbə məlumatlarına (mart 2024-cü il) görə, layihədə pay sahibləri bunlardır:
- Chevron Corp. (ABŞ) – 25%
- Isramco (İsrail) – 28,75%
- Mubadala Energy (BƏƏ) – 11%
- Union Energy – 11%
- Tamar Petroleum (İsrail) – 16,75%
- Dor Gas (İsrail) – 4%
- Everest (İsrail) – 3,5%