Azərbaycan Mərkəzi Bankının sədri Taleh Kazımov, Səudiyyə Ərəbistanının Al Ula şəhərində keçirilən Al Ula CEME 2025 (Conference on Economic and Monetary Evolution) tədbirində “İnkişaf etməkdə olan Bazarlarda Maliyyə Sisteminin Dayanıqlılığı” adlı paneldə çıxış edib.
GDP xəbər verir ki, çıxışı zamanı, cənab Kazımov rəqəmsal aktivlərin, xüsusilə kriptovalyutaların istifadəsinin artdığını vurğulayıb və bildirib: “Biz artıq rəqəmsal aktivlərin istifadəsinin, xüsusilə kriptovalyutaların artdığını görürük. Bu, rəqəmsal aktivlərə dair tənzimləmələrin sürətləndirilməsini zəruri edir.”
O, əlavə edib ki, son 3 ildə tənzimləmə və uyğunluq sahəsində böyük irəliləyişlər əldə olunub: “Tənzimləyici mühitdə müəyyən dəyişikliklər baş verdi və biz burada bunu açıq şəkildə müşahidə edirik. Əlbəttə, biz iqtisadi fəaliyyətlə beynəlxalq uyğunluq tələbləri arasında tarazlığı qorumağa çalışırıq.”
Kazımov həmçinin, bu tənzimləmələrin tətbiqinin müsbət nəticələr verdiyini qeyd edərək, “Bu müddət ərzində, xüsusilə müxbir bank şəbəkələrimiz sürətlə genişləndi,” – deyə vurğulayıb.