Azərbaycan Mərkəzi Bankının (AMB) rəhbəri Taleh Kazımov “PASHA Holding” və “Deloitte Azərbaycan”ın birgə təşkilatçılığı ilə keçirilən “Business Talks by PASHA Holding” tədbirində “Kapital bazarları və IPO: İnkişafa doğru” mövzusunda çıxış edib.
Tədbirdə çıxış edən Kazımov, sual-cavab sessiyasında ölkədə kapital bazarının mövcud vəziyyəti, əsas çağırışlar və gələcək prioritetlər barədə fikirlərini bölüşüb.
O, son dövrlərdə pul bazarında aparılan islahatlar, kapital bazarları qanunvericiliyinin beynəlxalq standartlara uyğunlaşdırılması və ilkin ictimai təklif (IPO) prosesinin təkmilləşdirilməsi istiqamətində görülən işləri xüsusi vurğulayıb.
Kazımov qeyd edib ki, qarşıdakı dövrdə əsas prioritetlər yeni emissiyaların stimullaşdırılması, investor bazasının genişləndirilməsi, tənzimləmə mexanizmlərinin təkmilləşdirilməsi, həmçinin şəffaflığın artırılması və investor hüquqlarının qorunması olacaq.
AMB rəhbəri bildirib ki, Mərkəzi Bank makroiqtisadi sabitliyi qorumaqla yanaşı, kapital bazarının inkişafı üçün səylərini davam etdirəcək.