AzInTelecom-un Məhsul və Xidmətlər Şöbəsinin müdiri Tamerlan Məşədihəsənli bildirib ki, tərəfdaş qurumlar üçün mühüm yenilik qüvvəyə minir və artıq yalnız SİMA İmza inteqrasiyası ilə Mərkəzi Bankın “Məsafədən hesabların açılması Qaydası”nın bütün tələblərinə tam əməl etmək mümkün olacaq.
GDP xəbər verir ki, onun sözlərinə görə, Mərkəzi Bank tərəfindən sözügedən qaydalara edilən dəyişikliklər 16 mart 2026-cı il tarixindən qüvvəyə minəcək. Yeni qaydalar çərçivəsində müştərilərə məsafədən xidmət göstərilməsi zamanı ilkin mərhələdə müştərinin eyniləşdirilməsi zəruri olacaq və bu proses risk əsaslı yanaşma nəzərə alınmaqla nəzarət subyektinin daxili qaydalarına uyğun aparılmalıdır.
Tamerlan Məşədihəsənli qeyd edib ki, yeni tələblərə əsasən eyniləşdirmə şəkil, videoçəkiliş və ya videozəng vasitəsilə həyata keçirilə bilər və bu üsulların hamısı SİMA İmza və SİMA KYC həlləri (API, SDK, video yazı və videozəng modulları) ilə təmin olunur. Eyni zamanda, eyniləşdirmə zamanı şəxsin canlılığının yoxlanılması məcburi xarakter daşıyır və müştəridən minimum üç hərəkətin yerinə yetirilməsi tələb olunur. Bildirilib ki, SİMA məhsullarında biometrik eyniləşdirmə bu tələblərə tam uyğun şəkildə həyata keçirilir.
O əlavə edib ki, yeni qaydalara əsasən eyniləşdirmə zamanı şəxsin üz təsviri dövlət informasiya sistemində mövcud olan fotoşəkillə proqram təminatı vasitəsilə üzləşdirilməlidir və bu tələb də SİMA həlləri ilə qarşılanır. Bununla yanaşı, gücləndirilmiş müştəri autentifikasiyası üsulları – şifrə, SMS kodu və oxşar mexanizmlər – ləğv edilib. Artıq maliyyə qurumları ilə müştərilər arasında bağlanan elektron müqavilə və razılaşmalar yalnız gücləndirilmiş elektron imza ilə təsdiqlənməlidir ki, bu funksiyanı da SİMA İmza təmin edir.
Məlumata görə, yeni “Məsafədən hesabların açılması Qaydası” həm vətəndaşlara, həm də vergi ödəyicilərinə eyni qaydada tətbiq ediləcək. Bundan əlavə, vergi ödəyiciləri üçün hesab açılarkən razılıq ərizələrinin imzalanması zamanı vergi ödəyicisinə məxsus gücləndirilmiş elektron imzaya ehtiyac olmayacaq, vətəndaş tipli gücləndirilmiş elektron imza kifayət edəcək.
Tamerlan Məşədihəsənli vurğulayıb ki, bütün bu tələblərin yerinə yetirilməsi üçün yalnız SİMA İmzanın inteqrasiyası kifayətdir. SİMA İmzanın biometrik imzalama funksionallığı tərəfdaş qurumlara həm KYC mərhələsində eyniləşdirmə tələblərini, həm də gücləndirilmiş elektron imza tələbini eyni vaxtda qarşılamaq imkanı yaradır.