ABŞ mediasında yayımlanan və adı açıqlanmayan Ağ Ev rəsmilərinə istinad edilən xəbərlərə görə, Prezident Donald Tramp, Zelenski ilə görüş başa çatdıqdan sonra Ukrayna nümayəndə heyətinin Ağ Evdən ayrılmasını tələb edib.
GDO xəbər verir ki, CNN-ə açıqlama verən Ağ Ev rəsmisinin sözlərinə görə, Oval Ofisdə baş verən gərgin görüşdən sonra Tramp, vitse-prezident JD Vens, dövlət katibi Marko Rubio və digər məsləhətçiləri ilə görüş keçirib.
Bu müzakirə zamanı Tramp Zelenskinin danışıqlar aparmağa hazır olmadığı qənaətinə gəlib və dövlət katibi Rubio ilə Milli Təhlükəsizlik müşaviri Mayk Voltsu başqa bir otaqda gözləyən Ukrayna nümayəndə heyətinə bu qərarı bildirmək üçün göndərib.
Vens və Rubio, Zelenski və digər nümayəndə heyətinin gözlədiyi otağa gedərək, Trampın “Ukraynalılar Ağ Evdən ayrıla bilər” mesajını çatdırıblar.
Bundan qısa müddət sonra Zelenski Ağ Evi tərk edib.
Nə baş vermişdi?
Ağ Evdə bir araya gələn Tramp və Zelenski arasında Oval Ofisdə keçirilən sual-cavab sessiyası zamanı uzun müddət davam edən gərgin mübahisə yaşanmışdı.
Tramp Zelenskiyə “Ya bu anlaşmanı imzalayarsan, ya da biz yoxuq. Bir problemi həll etməyə çalışırıq. Bizə nə hiss edəcəyimizi söyləmə. Üçüncü Dünya Müharibəsi ilə oynayırsan və bu, ölkəmizə hörmətsizlikdir. Çünki sən bizim nə edəcəyimizə qərar verəcək mövqedə deyilsən.” – deyə sərt cavab vermişdi.
Mübahisə davam etdikcə Tramp “Ölkən böyük bir təhlükə içindədir, bunu bilirsən. Biz olmadan qazana bilməyəcəyinizi də bilirik” ifadələrini işlədib.
Zelenski isə ABŞ ilə imzalanması nəzərdə tutulan nadir torpaq elementləri ilə bağlı sazişin mövcud mətninin “kafi” olmadığını bildirərək, “Biz təkcə atəşkəslə razılaşmayacağıq. Təhlükəsizlik zəmanəti olmadan hərəkət etməyəcəyik” deyib.
Kameralar qarşısında davam edən uzun mübahisənin ardından görüş başa çatıb. Daha sonra Tramp Truth Socialhesabında açıqlama verərək, planlaşdırılan ortaq mətbuat konfransının ləğv edildiyini elan edib.
Ortaq mətbuat konfransının və sazişin imza mərasiminin ləğv edilməsindən sonra Zelenski Ağ Evi tərk edib