TuranBank, Asiya İnkişaf Bankı (ADB) ilə strateji ticarət maliyyəşdirilməsi sahəsində əməkdaşlığa başladığını açıqlayıb.
GDP xəbər verir ki, bu əməkdaşlıq çərçivəsində TuranBank, Asiya İnkişaf Bankının Ticarət və Təchizat Zənciri Maliyyə Proqramı (TSCFP) altında banka ayrılan ticarət maliyyə limitindən istifadə etməyə başlayıb. Bu təşəbbüsün əsas məqsədi Azərbaycanda idxal-ixrac əməliyyatlarının genişləndirilməsinə dəstək vermək, neftdənkənar sektorun inkişafını təşviq etmək, xarici ticarəti gücləndirmək və müştərilərin ticarət maliyyə həllərinə çıxışını yaxşılaşdırmaqdır.
“TuranBank”ın Biznesin İnkişafı üzrə Baş Direktor müavini Ramil Xəlilov bu inkişafı bankın strateji prioritetləri və ölkə iqtisadiyyatına dəstək baxımından əhəmiyyətli bir addım kimi qiymətləndirir: “AİB ilə bu strateji tərəfdaşlıq bizim dəyər yönümlü maliyyə xidmətləri təqdim etmək və ölkənin iqtisadi diversifikasiya strategiyasını dəstəkləmək istiqamətindəki səylərimizdə əsas mərhələdir. Bu, xüsusilə Azərbaycanın qeyri neft ixracatçı və idxalçılarının beynəlxalq ticarət imkanlarını artırmaqda həlledici rol oynayacaq.”
ADB-nin TSCFP proqramı, inkişaf etməkdə olan ölkələrdə ticarət maliyyəsinin artırılması və təchizat zəncirlərinin dəstəklənməsi məqsədilə qurulub. TuranBankın bu proqrama inteqrasiyası yerli bizneslərin, xüsusilə kiçik və orta müəssisələrin (KOM) beynəlxalq ticarət əməliyyatlarını asanlaşdıracaq və onların maliyyə çıxışını yaxşılaşdıracaq.