Türkmənistan prezidenti Serdar Berdimuhamedov virtual aktivlərə dair qanunu imzalayaraq ölkədə kriptovalyuta mayninqi və kriptobirjaların fəaliyyətini leqallaşdırıb.
GDp xəbər verir ki, yeni qanuna əsasən, rəqəmsal valyuta hasilatı (mayninq) ilə məşğul olmaq hüququ artıq fərdi sahibkarlara və hüquqi şəxslərə verilir. Lakin bu fəaliyyətlə məşğul olanların Mərkəzi Bankda mütləq dövlət qeydiyyatından keçməsi tələb olunur.
Qanunda xüsusi qadağalar da nəzərdə tutulub. Xüsusilə, üçüncü şəxslərin avadanlıqlarının onların icazəsi olmadan mayninq məqsədi ilə istifadəsi qadağan edilib.
Kriptovalyuta reklamları ilə bağlı da bir sıra tələblər müəyyən edilib. Belə ki, bütün reklam materiallarında investorları risklər barədə xəbərdar edən, virtual aktivlərin dövlət tərəfindən təmin edilmədiyini və pul itkisi ehtimalını bildirən məlumatlar olmalıdır.
Sənəddə həmçinin qeyd olunub ki, Türkmənistan dövləti virtual aktivlərin dəyərinin itirilməsi və ya onların sərvətlərinin azalması halları üçün məsuliyyət daşımır. Virtual aktivlərin dəyəri geri qaytarılmır.
Bu qərar Türkmənistanın rəqəmsal iqtisadiyyat sahəsindəki addımlarından biri kimi qiymətləndirilir.