2025-ci ilin yanvar-noyabr aylarında ölkədə ümumi daxili məhsul (ÜDM) 116 320,1 milyon manat olmuşdur. 2024-cü ilin eyni dövrünün ümumi daxili məhsul həcmi 113 282,4 milyon manat ilə müqayisədə ÜDM-in həcmi 3 037,7 milyon manat və ya 2,68% artmışdır.
GDP-nin Dövlət Statistika Komitəsinin təqdim etdiyi məlumatlara əsasən apardığı hesablamalara görə,iqtisadiyyatın sektoral artım temblərində əhəmiyyətli dəyişikliklər müşahidə olunur. Neft-qaz sektorunda əlavə dəyər 2024-cü ildəki 0,4% artımın əvəzinə 2025-ci ildə 1,8% azalmış, bu da 2,2 faiz bəndi geriləmə deməkdir. Qeyri-neft-qaz sektorunda isə artım tempi 2024-cü ildəki yüksək 6,4%-dən 2025-ci ildə 3,2%-ə enmiş, lakin müsbət qalmışdır. Bunu, 3,2 faiz bəndi azalma kimi qiymətləndirmək olar.
ÜDM-in strukturu da dəyişmişdir. Sənayenin payı 37,1%-dən 34,0%-ə qədər azalaraq, 3,1 faiz bəndi geriləmişdir. Digər tərəfdən, “digər sahələr” kateqoriyasının payı 19,2%-dən 21,1%-ə qədər artaraq 1,9 faiz bəndi artım qeydə alınmışdır. Digər əhəmiyyətli pay dəyişiklikləri bunlardır: ticarət və nəqliyyat vasitələrinin təmiri sahəsinin payı 10,0%-dən 10,6%-ə (+0,6 faiz bəndi), tikintinin payı 6,2%-dən 6,5%-ə (+0,3 faiz bəndi), kənd təsərrüfatı, meşə və balıqçılığın payı 6,1%-dən 6,4%-ə (+0,3 faiz bəndi) artmışdır. Vergilərin payı isə 10,0%-dən 0,5 faiz bəndi azalaraq 9,5%-ə qədər enmişdir.
Əhalinin hər nəfərinə düşən ÜDM 11 104,2 manatdan 11 356,4 manata qədər yüksələrək 252,2 manat və ya 2,27% artmışdır.
Beləlilə 2025-ci ilin ilk on bir ayında ÜDM artımı davam etsə də, neft-qaz sektorunun mənfi performansı və qeyri-neft sektorunda artım dinamikasının azaması diqqəti cəlb edir. İqtisadiyyatda sənayenin payının azalması və xidmət və digər sahələrin payının artması struktur dəyişikliyə işarə edir. Adambaşına düşən gəlirin artımı isə ümumi iqtisadi fəaliyyətin artımı ilə uyğun gəlir.