Azərbaycanın qabaqcıl şirkətlər qrupundan olan NEQSOL Holding, Ukrayna Antiinhisar Komitəsindən (AMCU) United Mining and Chemical Company (UMCC) şirkətinin alqı-satqısı üzrə son təsdiqi alaraq mədənçilik və xammal sektorunda strateji genişlənmədə mühüm addım atıb.
GDP xəbər verir ki,bu barədə NEQSOL Holding-in Baş Direktoru Yusif Cabbarov məlumat verib.
Yusif Cabbarov bildirib ki, UMCC titan və sirkonium filizlərinin dünyada aparıcı istehsalçılarından biridir və bu şirkətin alınması NEQSOL-un kosmos, tibb və yüksək texnologiya sahələrində fəaliyyət göstərən strateji sənayelərə dəstək vermək öhdəliyinin əsas hissəsini təşkil edir. Baş direktor qeyd edib ki, NEQSOL Holding UMCC-nin istehsal imkanlarını beynəlxalq tərəfdaşlarla birlikdə modernləşdirərək genişləndirmək, məhsuldarlığı və dayanıqlığı artırmaq, həmçinin rəqəmsal transformasiyaya böyük sərmayə qoymaq niyyətindədir.
“Biz təhlükəsiz və davamlı təchizat zəncirlərinə xidmət edən kritik xammala artan tələbatı qarşılayacaq ixrac imkanlarımızı genişləndirməyə fokuslanmışıq. UMCC ilə birgə yeni innovativ həllər tətbiq edərək sənayedə rəqabət qabiliyyətimizi daha da gücləndirəcəyik,” – Yusif Cabbarov vurğulayıb.
Baş direktor Ukrayna hökumətinə, məsləhətçilərə və layihənin həyata keçirilməsində zəhmət çəkən komandaya dərin təşəkkürünü bildirib. O, əlavə edib ki, bu alqı-satqı Ukraynada dayanıqlı və gələcəyə hazır mədən sənayesinin formalaşması üçün vacib bir əsasdır.