İcbari Sığorta Bürosu (İSB) innovasiya, texnologiya və rəqəmsal sənaye sahəsində əldə etdiyi uğurlarına görə beynəlxalq “The BOLD Awards” müsabiqəsində qalib olub.
İSB 2024-cü ilin oktyabrında müsabiqəyə 3 kateqoriya üzrə müraciət edib. Dəyərləndirmə zamanı şəffaflıq, təsir dərəcəsi, əhatə dairəsi və insan faktoru kimi əsas meyarlara əsaslanan qiymətləndirmə nəticəsində İSB-nin təqdim etdiyi layihələr hər üç nominasiya üzrə finala yüksəlib.
Portuqaliyanın Lissabon şəhərində keçirilən tədbirdə münsiflərin qərarı və ictimai səsvermə əsasında İSB-nin İT layihələri “Boldest InsurTech” və “Boldest SaaS” nominasiyalarında qalib seçilib.
Qeyd edək ki, “The BOLD Awards” rəqəmsal sənayeyə əsaslanan 33 kateqoriya üzrə fərdi şəxslər, startaplar və şirkətləri bir araya gətirən beynəlxalq müsabiqədir. Burada süni intellekt, blokçeyn, robototexnika, sığorta texnologiyaları, proqram təminatı (SaaS), kosmik texnologiyalar və digər sahələrdə yenilikçi layihələr dəyərləndirilir.
Son bir ildə bu, İSB-nin beynəlxalq proqramlardan qazandığı beşinci mükafatdır. 2024-cü ildə Böyük Britaniyada keçirilən “Global Insurtech Awards” proqramında da İSB 3 kateqoriya üzrə qalib olub. Burada Büronun informasiya sistemi “Best Customer Engagement Software” nominasiyasında birincilik qazanıb. Bundan əlavə, “Best Embedded Insurance Provider” və “Insurtech of the Year” nominasiyalarında ikinci yerə layiq görülüb.
Bu uğurlar İSB-nin sığorta texnologiyaları sahəsində innovativ həllər təqdim etməsi və rəqəmsallaşmaya verdiyi töhfənin beynəlxalq miqyasda yüksək qiymətləndirildiyini göstərir.