Aqrar Sığorta Fondu aqrar sığorta fəaliyyəti üzrə müstəqil ekspert sertifikatı almaq istəyən namizədlər üçün növbəti təlimlərinə start verir.
GDP xəbər verir ki,müstəqil ekspert sertifikatı almaq istəyən şəxslər üçün imtahana qeydiyyat 14 may tarixindən 25 may tarixinədək davam edəcək. Təlimlər isə iyunun 6-11-də Bakı şəhəri, Xətai rayonu, 8 Noyabr prospekti 175 ünvanında (Aqrar Sığorta Fondunun inzibati binasında) təşkil ediləcək.
İmtahanda toplanılması mümkün olan ümumi (maksimal) bal 60-dır. 36 və daha yüksək bal toplamış namizədlər imtahandan müvəffəqiyyətlə keçmiş hesab edilir və onlara aqrar sığorta fəaliyyəti üzrə müstəqil ekspert sertifikatının müvafiq növü verilir.
Təlimlər Azərbaycan Respublikası Nazirlər Kabineti tərəfindən təsdiq edilmiş “Aqrar sığorta fəaliyyəti üzrə müstəqil ekspertlərin imtahanının keçirilməsi Qaydası”na əsasən keçirilir.
**Hansı sertifikat növləri üzrə təlimlər təşkil olunur?**
Təlimlər aşağıdakı növ sertifikatların verilməsi üçün müstəqil ekspert olmaq istəyən şəxslərin Dövlət İmtahan Mərkəzi tərəfindən keçiriləcək imtahanlara buraxılması məqsədi daşıyır:
1. Kənd təsərrüfatı bitkilərinin və bitkiçilik məhsullarının (çoxillik əkmələr də daxil olmaqla) sığortası üzrə müstəqil ekspert sertifikatı;
2. Kənd təsərrüfatı heyvanlarının və kənd təsərrüfatı məqsədilə yetişdirilən heyvanların sığortası üzrə müstəqil ekspert sertifikatı;
3. Akvakultura məhsullarının sığortası üzrə müstəqil ekspert sertifikatı.
**Namizədlərə hansı tələblər qoyulur?**
İmtahanda bitkiçilik, heyvandarlıq və akvakultura ixtisasları üzrə ali, orta ixtisas və ya peşə təhsilli şəxslər iştirak edə bilər. Peşə təhsilli namizədlər üçün müvafiq sahə üzrə 5 ildən az olmayan iş təcrübəsi tələb olunur.
**Sənədlər və təlim haqqı**
Təlimdə iştirak etmək istəyən namizədlər Aqrar Sığorta Fonduna aşağıdakı sənədləri təqdim etməlidirlər:
– şəxsiyyət sənədinin surəti;
– ixtisası təsdiq edən sənədin (diplom) surəti;
– peşə təhsilli namizədlər üçün 5 illik iş təcrübəsini təsdiq edən sənəd;
– xarici ölkədə ali təhsil aldıqda tanınma sənədinin surəti;
– ödənişi təsdiq edən sənəd.
Təlimlər ödənişlidir – iştirak haqqı 20 AZN (ƏDV daxil olmaqla) təşkil edir.
**Qeyd:** Kənd təsərrüfatı bitkiləri və bitkiçilik məhsulları üzrə ekspert-namizədlər üçün təlimdə iştirak mütləqdir. Təlimi müvəffəqiyyətlə başa vurmayan şəxslər Dövlət İmtahan Mərkəzinin təşkil etdiyi imtahanlarda iştirak edə bilməzlər.
Təlimi müvəffəqiyyətlə başa vurmuş şəxslərin siyahısı və sənədlər Aqrar Sığorta Fondu tərəfindən Dövlət İmtahan Mərkəzinə göndərilir.
Əlavə məlumat üçün 1651 çağrı mərkəzi (və ya 055 500 84 23) ilə əlaqə saxlamaq, yaxud career@asf.gov.az elektron poçt ünvanına müraciət etmək olar.