Aqrar Subsidiya Şurası, 2025-ci il üçün əkin və məhsul subsidiyaları ilə bağlı yeni qərarlar qəbul edib. Bu qərarlara əsasən, bəzi bitkilər üzrə subsidiyalar artırılıb, bəziləri isə azadılıb. Dəyişikliklər fermerlərin daha effektiv fəaliyyət göstərməsi və kənd təsərrüfatı məhsullarının istehsalının artırılması məqsədi daşıyır.
GDP xəbər verir ki, dəyişikliklərə əsasən şəkər çuğunduru üzrə subsidiyalar artırılıb.
Müasir suvarma sistemləri ilə təmin olunmuş əkin sahələri üzrə məhsul subsidiyası 19 AZN/ton-dan 22 AZN/ton-a qədər artırılıb ki, bu da 15,8% artım deməkdir. Müasir suvarma sistemləri ilə təmin olunmamış əkin sahələri üzrə isə məhsul subsidiyası 18 AZN/ton-dan 19 AZN/ton-a qədər artırılıb ki, bu da 5,6% artım deməkdir.
Tütün üzrə subsidiyalar azadılıb
Virciniya sortu, yaş tütün üzrə məhsul subsidiyası 36 AZN/ton-dan 34 AZN/ton-a qədər azadılıb ki, bu da 5,6% azalma deməkdir. Digər tütün növləri üzrə quru məhsul subsidiyası isə 220 AZN/ton-dan 200 AZN/ton-a qədər azadılıb ki, bu da 9,1% azalma deməkdir.
Soya üzrə subsidiyalar azadılıb
Müasir suvarma sistemləri ilə təmin olunmamış əkin sahələri üzrə məhsul subsidiyası 100 AZN/ton-dan 95 AZN/ton-a qədər azadılıb ki, bu da 5% azalma deməkdir.
Qaragilə (mavigilə) üzrə yeni subsidiyalar tətbiq edilib
Torf və perlit qarışığında dibçəklərdə əkilən qaragilə (mavigilə) bağları üçün 15.000 AZN/ha məbləğində əkin subsidiyası müəyyən edilib. Torpaqda (pH 6.5-dən az olan) əkilən qaragilə (mavigilə) bağları üçün isə 7.500 AZN/ha məbləğində əkin subsidiyası müəyyən edilib.
İqlim stansiyası qurulması tələbi
15 hektar və ya daha çox sahədə əkilən üzüm və intensiv meyvə bağları üçün fermerlər tərəfindən iqlim stansiyası qurulması tələb olunur. Bu tələb 2025-ci il 1 yanvar tarixindən sonra salınan bağlara şamil ediləcək.
Aqrar Subsidiya Şurasının qərarları, kənd təsərrüfatı sahəsində daha yüksək məhsuldarlıq və effektivliyin təmin edilməsi üçün tətbiq olunur. Bu dəyişikliklər fermerlərin dəstəklənməsi və kənd təsərrüfatı məhsullarının istehsalının artırılması istiqamətində mühüm addım hesab olunur.