2026-cı ilin yanvar ayında Azərbaycanda fəaliyyət göstərən 16 sığorta şirkəti tərəfindən ümumilikdə 156 milyon 604 min manat sığorta haqqı toplanılıb. Azərbaycan Mərkəzi Bankının açıqladığı aylıq statistikaya əsasən, bu göstərici ötən ilin eyni dövrü ilə müqayisədə 4,3% azalıb.
Ödənişlərdə kəskin artım
Hesabat ayında sığorta şirkətlərinin həyata keçirdikləri ödənişlərin məbləği 62 milyon 12 min manat təşkil edib. Bu, illik müqayisədə 30,2% çoxdur. Ödənişlərin dinamikası bazarın ayrı-ayrı seqmentlərində fərqli mənzərə yaradıb. Könüllü sığorta növləri üzrə ödənişlər 34% artaraq 50 milyon 262 min manata, icbari sığorta üzrə ödənişlər isə 16,2% artaraq 11 milyon 750 min manata çatıb.
Şirkətlərin ödəniş renkinqi
Hesabat dövründə ən çox ödəniş həyata keçirən şirkət 35 milyon 330 min manatla “Paşa Həyat Sığorta” olub. Bu şirkət ötən ilin yanvarına nisbətən ödənişlərini 38,2% artırıb. İkinci yerdə 11 milyon 185 min manat ödənişlə “Paşa Sığorta” qərarlaşıb (artım 27,4%). Üçüncü yerdə isə 4 milyon 688 min manat ödənişlə “Atəşgah Həyat” Sığorta Şirkəti qərarlaşıb.
Dinamikada ən yüksək artım “Xalq Həyat” Sığorta Şirkətində qeydə alınıb. Şirkətin ödənişləri 1200% (12 dəfə) artaraq 520 min manata çatıb. “Meqa Həyat Sığorta”da isə artım 981,8% təşkil edib. Digər tərəfdən, ödənişlərini ən çox azaldan şirkətlər sırasında “Aqrar Sığorta” (-91,6%), “AzSığorta” (-86,8%) və “İpək Yolu Sığorta” (-100%) yer alıb. Sonuncu şirkət bu ilin yanvarında heç bir ödəniş həyata keçirməyib.
Könüllü və icbari sığortada vəziyyət
Hesabat dövründə könüllü sığorta növləri üzrə 136 milyon 456 min manat, icbari sığorta növləri üzrə isə 20 milyon 148 min manat sığorta haqqı toplanılıb. Ötən ilin eyni dövrü ilə müqayisədə könüllü sığorta üzrə yığımlar 2,9% (4 milyon 145 min manat), icbari sığorta üzrə yığımlar isə 12,6% (2 milyon 909 min manat) azalıb.
Zərərlilik göstəricilərində dəyişiklik
Könüllü sığorta bazarında zərərlilik əmsalı (toplanmış hər 100 manat haqqa düşən ödəniş) artıb. Ötən ilin yanvarında bu rəqəm 26,7 manat idisə, bu ilin eyni dövründə 36,8 manata yüksəlib. İcbari sığorta bazarında isə bu göstərici daha yüksək olub – hər 100 manat haqqa 58,3 manat ödəniş düşüb (2025-ci ilin yanvarında 43,8 manat).
Tibbi sığorta: yığımlar azalıb, xərclər artıb
Bu ilin yanvar ayında könüllü tibbi sığorta üzrə yığımlar 51 milyon 669 min manat təşkil edib. Bu, ötən ilin eyni dövrü ilə müqayisədə 11,3% azdır (2025-ci ilin yanvarında bu rəqəm 58 milyon 313 min manat idi). Eyni zamanda, tibbi sığorta üzrə ödənişlərin həcmi 6 milyon 854 min manata çataraq illik müqayisədə 37,8% artıb.
Bu tendensiya tibbi sığortada zərərliliyin kəskin artmasına səbəb olub. Belə ki, ötən ilin yanvarında sığorta şirkətləri könüllü tibbi sığorta üzrə topladıqları hər 100 manatdan cəmi 8,5 manatını ödənişlərə yönəldirdisə, bu ilin eyni dövründə bu göstərici 13,2 manata yüksəlib. Bu, səhiyyə xidmətlərinin qiymətindəki artım və ya müraciətlərin sayındakı yüksəlişlə əlaqədar ola bilər.