ABŞ Federal Ehtiyat Sisteminin (FED) sədri Cerom Pauell ölkənin dövlət borcunun hazırkı vəziyyətini “dözülməz” adlandıraraq ciddi xəbərdarlıq edib.
GDP xəbər verir ki, onun sözlərinə görə, borcun artım temp iqtisadi inkişafı xeyli qabaqlayır və bu tendensiya davam edərsə, nəticələr fəlakətli ola bilər.
Pauell vurğulayıb ki, Amerika Birləşmiş Ştatları öz borcunu tamamilə sıfırlamalı deyil, lakin büdcə tarazlığının təmin edilməsi və iqtisadiyyatın borclanma tempindən daha sürətli böyüməsi vacib şərtdir. Əks halda, yaxın vaxtlarda qəti addımlar atılmasa, vəziyyət “pis son”la nəticələnəcək.
Bu açıqlama ABŞ Maliyyə Nazirliyinin mart ayında dərc etdiyi məlumatlardan sonra verilib. Həmin hesabata əsasən, ABŞ-ın dövlət borcu tarixdə ilk dəfə 39 trilyon dollar həddini keçib və artmaqda davam edir. Ekspertlər qeyd edir ki, bu, ölkənin gələcək iqtisadi sabitliyi üçün əhəmiyyətli risklər yaradır.
Pauellin sərt ritorikası, xüsusilə seçki öncəsi dövrdə siyasi qurumlardan və maliyyə çevrələrindən müxtəlif reaksiyalar alıb. Bəzi iqtisadçılar FED sədrinin narahatlıqlarını əsaslı hesab edir və hökuməti struktur islahatlarına səsləyir.