İcbari Sığorta Bürosu (İSB) Hüquqi Şəxslərin İttifaqı vətəndaşlara və sığorta bazarının iştirakçılarına göstərilən xidmətlərin keyfiyyətinin artırılması məqsədilə yeni rəqəmsal layihələrin icrasını davam etdirir.
GDP xəbər verir ki, bu çərçivədə İSB tərəfindən 4 yeni elektron xidmət istifadəyə verilib.
Yeni elektron xidmətlər aşağıdakılardır:
-
Bonus-malus əmsalı ilə bağlı onlayn müraciət
-
Radar cəriməsi üzrə onlayn müraciət
-
Şəxsin yazılı razılığı əsasında sığorta hadisəsi tarixçəsinin sorğulanması üzrə onlayn müraciət
-
Sığorta hadisəsi üzrə müstəqil ekspert təyini üzrə onlayn müraciət
Xidmətlərdən istifadə imkanının yaradılması məqsədilə İSB-nin yenilənmiş rəsmi internet saytında “Elektron xidmətlər” bölməsi yaradılıb. İstifadəçilər bu xidmətlərdən yararlanmaq üçün İSB-nin informasiya sistemindəki şəxsi kabinetə myGov ID, SİMA İmza, Asan İmza və ya elektron imza (e-imza) vasitəsilə daxil ola bilərlər.
“Bonus-malus əmsalı üzrə onlayn müraciət” sığorta müqaviləsi bağlanarkən sığorta haqqının hesablanması zamanı yaranan məsələlərin araşdırılması məqsədi daşıyır. Bu xidmət vasitəsilə sığortalının əvvəlki sığorta tarixçəsi, qəzasız sürücülük göstəriciləri, həmçinin tətbiq edilən endirim və ya əlavələr yoxlanılır.
“Radar cəriməsi üzrə onlayn müraciət” isə radar vasitəsilə qeydə alınmış inzibati xətalarla bağlı vətəndaş müraciətlərinin qəbulu və araşdırılması üçün nəzərdə tutulub. Araşdırma zamanı cərimənin əsassız və ya yanlış tətbiq edildiyi müəyyən olunarsa, İSB tərəfindən cərimənin ləğvi ilə bağlı müvafiq qurumlara rəsmi müraciət göndərilir.
“Sığorta hadisəsi tarixçəsinin sorğulanması üzrə onlayn müraciət” sığorta şirkətlərinə, sığortalının yazılı razılığı əsasında, onun əvvəlki sığorta hadisələri barədə məlumatları elektron qaydada əldə etməyə imkan yaradır. Bu, məlumatların operativ və təhlükəsiz ötürülməsini təmin edir.
“Müstəqil ekspert təyini üzrə onlayn müraciət” xidməti isə sığorta hadisəsi ilə bağlı qanunvericilikdə nəzərdə tutulan 7 iş günü ərzində qiymətləndirmə aparılmadıqda və ya təqdim edilən qiymətləndirmə nəticəsi vətəndaşı qane etmədikdə, zərərçəkmiş və ya faydalanan şəxslərə müstəqil ekspert seçimini tam rəqəmsal şəkildə həyata keçirməyə imkan verir.
Qeyd olunub ki, müraciətlərin elektron formada təqdim edilməsi vətəndaşların Büroya və sığorta şirkətlərinə fiziki müraciətinə, eləcə də poçt xidmətlərindən istifadəyə ehtiyacı aradan qaldırmaqla xidmətlərin daha operativ və səmərəli göstərilməsinə şərait yaradır.