“İcbari Sığorta Bürosu” Hüquqi Şəxslərin İttifaqı (İSB) sığorta sektorunda rəqəmsallaşmanı daha da genişləndirmək və şəffaflığı artırmaq istiqamətində yeni bir addım atıb. Büronun informasiya sistemi vasitəsilə Daxili İşlər Nazirliyindən “Forma 4” arayışının elektron sorğulanması imkanı indi könüllü sığorta müqavilələri üçün də tətbiq edilib.
Daha əvvəl bu xidmət yalnız İSB-nin üzvü olan sığortaçılar üçün mövcud idi və tək icbari sığorta müqavilələri ilə məhdudlaşırdı. Yenilənmiş qaydaya əsasən, artıq Büronun üzvü olan sığortaçılar həm icbari, həm də könüllü sığorta müqavilələri üzrə, üzv olmayan sığortaçılar isə yalnız könüllü sığorta sahəsində “Forma 4” sənədini əldə edə biləcəklər.
Layihənin əsas məqsədi kimi sığorta bazarında məlumat axınının vahid mərkəzdən idarə edilməsi, zərərin araşdırılma proseslərinin sürətləndirilməsi və qərarların qəbulunda obyektivliyin artırılması göstərilir.
Tətbiq olunan yeni mexanizm sığorta şirkətləri arasında etibarlı və operativ məlumat mübadiləsini təmin edir, araşdırma proseslərini sürətləndirir və insan amilinin təsirini minimuma endirir. Bununla yanaşı, məlumatların dəqiqliyinin və məxfilik təhlükəsizliyinin təmin edilməsi üçün müasir texnoloji həllərdən istifadə olunur.
Nəticədə, sektorun məlumat infrastrukturu daha da güclənir, idarəetmə keyfiyyəti yüksəlir və bazarda daha şəffaf, davamlı və rəqəmsal mühitin formalaşmasına şərait yaradılır.