İcbari Sığorta Bürosu (İSB) Hüquqi Şəxslərin İttifaqı vətəndaşlara və sığorta bazarının iştirakçılarına göstərilən xidmətlərin keyfiyyətinin yüksəldilməsini əsas prioritetlərdən biri kimi müəyyən edib.
GDP xəbər verir ki, bu məqsədlə İSB-nin rəsmi internet səhifəsi – www.isb.az təkmilləşdirilmiş formada və yeni dizaynda istifadəyə verilib.
Yenilənmiş saytın əsas məqsədi istifadəçilər üçün daha rahat, çevik və funksional platforma yaratmaq, informasiya əlçatanlığını artırmaqdır. Veb səhifə müasir dizayn və təkmilləşdirilmiş struktur əsasında hazırlanıb, istifadəni asanlaşdıran yeni texniki imkanlarla zənginləşdirilib. Naviqasiya sistemi sadələşdirilib, ən çox istifadə olunan bölmələr ön plana çıxarılıb, Azərbaycan və ingilis dillərində istifadə imkanı təmin edilib.
Yeni versiyada vətəndaşlar, sığorta şirkətləri və digər maraqlı tərəflər üçün vacib məlumatlar sistemləşdirilib. Saytda icbari sığorta növləri, sığorta hadisəsi zamanı atılacaq addımlar və prosedur qaydaları, tpl.az platforması, eləcə də Yaşıl Kart sistemi barədə ətraflı məlumatlar təqdim olunur. Bundan əlavə, sığorta növləri üzrə statistik göstəricilər yerləşdirilib və bu məlumatlar mütəmadi olaraq yenilənir.
İSB-nin informasiya sistemində “Şəxsi kabinet”in dizaynı yenilənib, funksionallığı genişləndirilib. Saytda 4 yeni elektron xidmət istifadəyə verilib. İstifadəçilər bonus-malus əmsalı, sığorta tarixçəsi, radar cərimələri, sığorta hadisəsi üzrə müstəqil ekspertin təyin olunması və digər məsələlərlə bağlı müraciətlərini artıq elektron qaydada təqdim edə bilərlər.
Sığorta müqavilələrinin yoxlanılması üçün istifadə olunan www.yoxla.isb.az, www.services.isb.az və www.greencard.isb.az linkləri də yeni saytın strukturuna uyğunlaşdırılıb. Bu platformalar vasitəsilə istifadəçilər sığorta müqavilələrinin statusunu yenilənmiş interfeys üzərindən rahat şəkildə yoxlaya bilirlər.
Əlilliyi olan şəxslərin internet resursundan istifadəsini asanlaşdırmaq məqsədilə sayta “Müyəssərlik menyüsü” əlavə edilib. Bu menyü şrift ölçüsünün tənzimlənməsi, kontrast rejimlərinin seçilməsi, məzmunun böyüdülməsi, klaviatura ilə naviqasiya və animasiyalı elementlərin deaktiv edilməsi kimi imkanlar yaradır.
İSB-nin fəaliyyəti, sığorta sektorunda baş verən yeniliklər və nailiyyətlər, qanunvericilikdə dəyişikliklər, maarifləndirici tədbirlər, tez-tez verilən suallar və digər aktual məlumatlar bundan sonra da sayt vasitəsilə operativ şəkildə ictimaiyyətə çatdırılacaq.