Azərbaycan Mərkəzi Bankı ödəniş daxilolmaları əsasında aktivlik indeksi hazırlayıb.İndeksin qeyri-neft-qaz ÜDM-in artım tempi ilə korrelyasiyası 45% təşkil etsə də, korrelyasiya əmsalı 2020-ci ilin yanvar ayından etibarən 66%-ə yüksəlir.
GDP xəbər verir ki, bu barədə Azərbaycan Mərkəzi Bankının təqdim etdiyi “Sahələrarası maliyyə axınlarının təhlilinə dair hesabatın”da məlumat verilib.
Bildirilir ki, hesabatda qeyri-neft-qaz ÜDM-in yüksək tezlikdə izlənilməsi məqsədilə ödəniş daxilolmaları əsasında aktivlik indeks hazırlanmış və qeyri-neft-qaz ÜDM-in rüblük artım tempi ilə əlaqəsi Şəkil 1-də göstərilib.
Qeyd olunur ki, indeksin hesablanması məqsədilə iqtisadi fəaliyyət sahələri üzrə mövsümi təmizlənmiş ödəniş daxilolmaları “Əsas komponentlərin təhlili” (Principal component analysis) metodu vasitəsilə vahid indeksdə aqreqatlaşdırılmışdır. İndeksin qeyri-neft-qaz ÜDM-in artım tempi ilə korrelyasiyası 45% təşkil etsə də, korrelyasiya əmsalı 2020-ci ilin yanvar ayından etibarən 66%-ə yüksəlir.
Bu baxımdan indeks real vaxt rejimində qeyri-neft sektoru üzrə iqtisadi artım haqqında fikir formalaşdırmağa imkan verir.