Vyana şəhərində Qafqaz, Orta Asiya və Monqolustan mərkəzi banklarının nümayəndələrinin iştirakı ilə keçirilən toplantıda Azərbaycan Mərkəzi Bankının Pul siyasəti departamentinin direktoru Azər Ələsgərov “Azərbaycanda pul siyasətinin kommunikasiyası” mövzusunda təqdimatla çıxış edib.
GDP xəbər verir ki,çıxışında son illərdə ölkədə pul siyasəti kommunikasiyasının alətlərinin və kanallarının əhəmiyyətli dərəcədə genişləndirildiyini bildirən Ələsgərov, müxtəlif hədəf qrupları üçün hazırlanan analitik materialların məzmununun gələcəkyönümlü olması üçün davamlı işlər görüldüyünü vurğulayıb.
Mərkəzi Bank nümayəndəsi qeyd edib ki, kommunikasiya strategiyasında əsas makroiqtisadi göstəricilər üzrə proqnozlara daha çox yer verilib. Ənənəvi ünsiyyət kanalları ilə yanaşı, sosial media platformalarında da məlumatların əlçatan şəkildə təqdim edilməsi üçün mühüm dəyişikliklər edilib.
Ələsgərov bu yeniliklərin ictimaiyyətin iqtisadi proseslər barədə məlumatlandırılması, şəffaflığın artırılması, hesabatlılıq səviyyəsinin yüksəldilməsi və etibarın gücləndirilməsi baxımından əhəmiyyətli olduğunu, bunun da pul siyasətinin effektivliyinə müsbət təsir göstərdiyini bildirib.
Qeyd edək ki, belə beynəlxalq toplantılar mərkəzi banklar arasında təcrübə mübadiləsi və uğurlu praktikaların paylaşılması üçün mühüm platforma rolunu oynayır.