“Apple” və “Microsoft” arasında davam edən dünyanın ən dəyərli şirkəti adına yeni bir rəqib əlavə olunub. Süni intellekt məhsulları sayəsində “NVIDIA” son saatların ən dəyərli şirkəti olub. Şirkətin səhmləri tarixi yüksəliş göstərərək, rekord qırıb.
GDP xəbər verir ki,”NVIDIA” texnologiya nəhəngi “Microsoft”u geridə qoyaraq bazar dəyərinə görə dünyanın ən dəyərli şirkəti olub. Şirkətin səhmləri 3,7% artaraq 135,87 dollara satılıb. Müvafiq olaraq, “NVIDIA”nın bazar dəyəri 3,34 trilyon dollar olub.
Bu rəqəm, gün ərzində səhmləri 0,5% ucuzlaşan “Microsoft”un 3,31 trilyon dollarlıq bazar dəyərini ötüb. Əvvəllər ikinci ən dəyərli şirkət olan “Apple”ın səhmləri 1,2% ucuzlaşaraq 3,28 trilyon dollara düşüb. “NVIDIA” səhmləri “Microsoft”un 20% qazancı ilə müqayisədə təxminən üç dəfə artıb.
Qeyd edək ki, texnologiya nəhəngləri süni intellekt imkanlarını təkmilləşdirmək üçün “NVIDIA”nın çiplərindən istifadə edirlər.