Beynəlxalq qızıl bazarında qiymətlər bazar ertəsi günü bir unsiya üçün 2700 dollardan aşağı düşüb.
GDP xəbər verir ki, bu, Rusiya-Ukrayna münaqişəsindəki gərginliyin artması fonunda keçən həftəki 6% artımdan sonra baş verib. Analitiklər bu düşüşü ehtimal olunan texniki düzəliş kimi qiymətləndirirlər.
Rusiya Prezidenti Vladimir Putin ötən həftə Ukraynaya qarşı yeni raket hücumları ilə bağlı açıqlama verərək, gərginliyi daha da artırıb. Putin, ABŞ və Böyük Britaniya istehsalı olan silahların Rusiya ərazisinə yerləşdirilməsinə cavab olaraq bu addımı atacağını bildirib.
Digər tərəfdən, ABŞ-ın yeni seçilmiş prezidenti Donald Trump’ın hedcinq fondu meneceri Scott Bessentin’i Xəzinədarlıq Nazirliyinin rəhbəri vəzifəsinə təyin etməsi, dolların zəifləməsinə səbəb olub və bu da qızılın qiymətinə müəyyən dəstək verib. Bessentin’in tariflərə daha balanslı yanaşma tərəfdarı olduğu düşünülür ki, bu da aqressiv ticarət siyasəti ilə bağlı narahatlıqları azaldır.
Bazar iştirakçıları indiki zamanda Federal Ehtiyatın noyabr iclas protokolunu, PCE inflyasiya məlumatlarını və digər əsas ABŞ iqtisadi göstəricilərini diqqətlə izləyirlər. Bu məlumatlar ABŞ-ın faiz dərəcəsi siyasətinin gələcək istiqamətini müəyyən edəcək və qızılın qiymətinə təsir göstərəcək. Qızıl bazarının gələcək hərəkətlərinin müxtəlif faktorların qarşılıqlı təsirlərindən asılı olacağı gözlənilir.