Cari ilin yanvar fevral ayları ərzində sığorta bazarı ümumi 277.562 min manat həcmindən 281.206 min manata yüksəlmiş, yəni +3.644 min manat və ya 1,3% artım qeydə alınmışdır. Bununla paralel olaraq, ümumi sığorta ödənişləri 108.595 min manatdan 149.800 min manata yüksəlmiş, bu isə +41.205 min manat (+38,0%) artım deməkdir. Ödənişlərin haqlardan xeyli sürətlə artması bazarın yetkinləşməsini, sığorta hadisələri tezliyinin yüksəldiyini və risk mühitinin dəyişdiyini aydın şəkildə ortaya qoyur.
Könüllü sığorta sektorunda müsbət dinamika davam etmişdir. Bu seqmentdə haqlar 220.090 min manatdan 234.436 min manata artmış, yəni +14.346 min manat və ya 6,5% artım əldə edilmişdir. İcbari sığortada isə əksinə, haqlarda ciddi azalma müşahidə olunmuş, bu sinifin ümumi haqları 61.116 min manatdan 43.126 min manata düşmüşdür. Bu 17.990 min manat və ya 29,4% azalma, xüsusən daşınmaz əmlakın icbari sığortasındakı kəskin geriləmə səbəbindən baş vermişdir.
Müəllif:Aynur Qəniyeva