Pakistanın Kommunikasiya naziri Abdul Aleem Xan COP29 çərçivəsində keçirilən “Şəhər Nəqliyyatının Yaşıllaşdırılması üzrə Yüksək Səviyyəli Dəyirmi Masa”da çıxış edib.
GDP xəbər verir ki, nazirin sözlərinə görə, Pakistan beynəlxalq iqlim maliyyələşməsinə məhdud çıxışa malikdir. Ölkə Qlobal Ətraf Mühit Fondundan 15 layihə həyata keçirib. Pakistan Dövlət Bankı 2017-ci ildə kommersiya banklarında ekoloji risk menecmentini təşviq etmək və iqlim maliyyələşməsini artırmaq üçün yaşıl bankçılıq təlimatlarını təsdiqləyib.
A.Xan qeyd edib ki, Pakistan iqlim dəyişikliyinə qarşı həssas olduğu və iqtisadiyyatın dekarbonizasiyası üçün böyük kapital tələb olunduğu üçün maliyyə ehtiyacları yüksək olaraq qalır. Ölkə beynəlxalq iqlim maliyyələşməsinə çıxışın artırılmasının Pakistan iqtisadiyyatına öz töhfəsini verə biləcəyini düşünür və Paris Sazişinin 6-cı maddəsində nəzərdə tutulan alətlərdən istifadəni nəzərdən keçirir.
Nazir çıxışının sonunda bütün iştirakçıları əl-ələ verib şəhər nəqliyyat sistemində davamlı və yaşıl inqilaba nail olmağa və dünyanı yaşamaq üçün daha gözəl məkana çevirməyə çağırıb.