Ötən il Azərbaycanda sənaye zonalarında avtomobil istehsalı əhəmiyyətli dərəcədə artaraq 6 minə yaxın olub.
GDP xəbər verir ki, 2018-ci ildən 2024-cü il də daxil olmaqla İqtisadi Zonaların İnkişafı Agentliyinin idarəçiliyində olan sənaye zonalarında 442,5 milyon manatlıq avtomobil istehsalı həyata keçirilib.
Agentliyin məlumatına görə, təkcə ötən il ərzində Hacıqabul Sənaye Parkında 107,5 milyon manatlıq 3761 ədəd avtomobil, Neftçala Sənaye Məhəlləsində isə 54,65 milyon manatlıq 2182 ədəd avtomobil istehsal edilib. Avtomobil istehsalı ötən ilin müvafiq dövrü ilə müqayisədə təqribən 34% artıb.
Sözügedən dövrdə sənaye zonalarında “Chevrolet”, “Isuzu”, “VGV”, “UAZ”, “Lada”, “Khazar” və digər markalı avtomobillər istehsal edilib. Artan istehsal həcmi ölkənin avtomobil sənayesinin inkişafında mühüm addım hesab olunur.