Avropanın ən böyük avtomobil konserni olan Volkswagen-in baş direktoru son açıqlamasında diqqətçəkən bir çağırış edib. O, Qərb ölkələrinin sənayenin planlaşdırılması sahəsində Çin siyasətini təcrübə olaraq götürməli olduğunu vurğulayıb.
GDP xəbər verir ki, bu açıqlama, Avropa avtomobil istehsalçılarının Çin brendləri qarşısında getdikcə çətinləşən rəqabət vəziyyətini bir daha göz önünə serir.
Bənzər bir tendensiya ABŞ-da da müşahidə edilir. Amerikalı istehlakçıların Çin istehsalı elektrik avtomobillərinə marağı getdikcə artır. Mövcud tarif maneələrinə baxmayaraq, alıcıların bu avtomobilləri Meksika üzərindən idxal etməyə belə hazır olduqları bildirilir. Bu vəziyyət, Çin elektromobillərinin həm texnoloji səviyyəsinə, həm də qiymət siyasətinə olan etimadın nə qədər yüksək olduğunu göstərir.
Xəbərdə həmçinin ABŞ avtomobil bazarında qiymət artımının sürətlə davam etdiyi qeyd edilir. Hazırda ölkədə yeni avtomobillərin orta qiyməti 50 min ABŞ dollarına yaxınlaşır. Bu da istehlakçıları daha əlverişli və rəqabətqabiliyyətli qiymət təklif edən alternativ brendlərə – xüsusilə də Çin istehsalı olan elektromobillərə – yönəldir.
Ekspertlər hesab edir ki, bu durum qlobal avtomobil sənayesində güc balansının kökündən dəyişdiyini göstərir. Qərb istehsalçıları ya dövlət tərəfindən dəstəklənən uzunmüddətli planlaşdırma modelinə keçid etməli, ya da bazarda mövqelərini itirməklə üzləşəcəklər.
