ABŞ, Avropa və Yaxın Şərqdən olan varlı investorlar qızıl ehtiyatlarını kütləvi şəkildə Sinqapura köçürməyə başlayıblar. Geosiyasi gərginlik və iqtisadi qeyri-müəyyənlik fonunda ölkədə saxlanılan özəl qızıl ehtiyatlarının həcmi son illərdə kəskin artıb.
GDP xəbər verir ki, Bloomberg-in məlumatına görə, investorların bu addımı atmasına dünyada davam edən hərbi münaqişələr, dövlət borclarının artması və siyasi qeyri-sabitliklə bağlı narahatlıqlar səbəb olub.
Məlumata əsasən, Sinqapurda saxlanılan özəl qızıl ehtiyatlarının həcmi 2014-cü ildən bəri təxminən 16 dəfə artaraq 2025-ci ildə 800 tonu ötüb.
Qızıl ehtiyatlarının artımında əsas pay Avropadan olan investorların üzərinə düşüb. Belə ki, avropalı müştərilər aktivlərini daha təhlükəsiz hesab etdikləri məkanlarda saxlamaq məqsədilə qızıl ehtiyatlarını Sinqapura yönəldirlər.
Qlobal geosiyasi risklərin artması və dövlət borclarının yüksəlməsi fonunda investorlar sərvətlərini qorumaq və aktivlərini şaxələndirmək məqsədilə fiziki qızıla üstünlük verirlər.
Bu tendensiya Sinqapurun beynəlxalq qızıl saxlama mərkəzi kimi mövqeyinin gücləndiyini və varlı investorların aktivlərinin coğrafi bölgüsünə daha çox diqqət yetirdiyini göstərir.
