İqtisadiyyat naziri Mikayıl Cabbarovun İtaliyaya işgüzar səfəri çərçivəsində sənaye, ticarət, investisiya və enerji sahələrində əməkdaşlığın inkişafı müzakirə olunub.
GDP.az xəbər verir ki, nazir İtaliyanın şirkətlər və “Made in Italy” naziri Adolfo Urso ilə görüşüb. Görüşdə İtaliya şirkətlərinin Azərbaycandakı fəaliyyəti, yeni birgə layihələrin təşviqi və iqtisadi əlaqələrin genişləndirilməsi barədə fikir mübadiləsi aparılıb.
İtaliyanın texnologiya və mühəndislik təcrübəsinin Azərbaycanın qeyri-neft-qaz sənayesinin inkişafında tətbiqi imkanları diqqətə çatdırılıb. Mədənçilik, metallurgiya, kritik minerallar, süni intellekt və rəqəmsal infrastruktur sahələrində tərəfdaşlıq potensialı nəzərdən keçirilib.
İstehsalın modernləşdirilməsi, texnologiya transferi və yüksək əlavə dəyərli məhsulların istehsalı üçün biznes əlaqələrinin genişləndirilməsinin əhəmiyyəti vurğulanıb. Birgə layihələrin dəstəklənməsi məqsədilə İtaliyanın maliyyə və investisiya institutları ilə əməkdaşlıq perspektivləri də müzakirə edilib.
Mikayıl Cabbarovun “Eni” şirkətinin baş icraçı direktoru Klaudio Deskalsi ilə görüşündə isə SOCAR-la şirkət arasında tərəfdaşlığın inkişafı diqqət mərkəzində olub. SOCAR-ın “Eni” ilə yeni təşəbbüslərdə iştirakı və üçüncü ölkələrdə birgə layihələr üzrə əməkdaşlığın genişləndirilməsi imkanları nəzərdən keçirilib.
Tərəflər Azərbaycanda bioyanacaq istehsalı üzrə birgə pilot layihənin gedişi, enerji keçidi və texnoloji təcrübə mübadiləsi istiqamətində əməkdaşlıq perspektivləri barədə də fikir mübadiləsi aparıblar.
