Microsoft-un qurucusu Bill Qeyts 2027-ci ildə süni intellektdən istifadə edilməklə həyata keçirilən kiberhücumların sayının artacağı barədə xəbərdarlıq edib.
GDP.az xəbər verir ki, milyarder iş adamı CNN telekanalına müsahibəsində süni intellektin yaratdığı təhlükələrə diqqət çəkib.
Qeytsin sözlərinə görə, süni intellekt sahəsində əsas risk texnologiyanın insan nəzarətindən çıxması deyil, onun kibercinayətkarlar tərəfindən zərərli məqsədlərlə istifadə olunmasıdır.
“Bizi çoxsaylı xoşagəlməz sürprizlər gözləyir”, – deyə o bildirib.
Microsoft-un qurucusu hesab edir ki, süni intellekt texnologiyalarının sürətli inkişafı kibertəhlükəsizlik sahəsində yeni çağırışlar yaradacaq. Bu texnologiyalardan cinayətkar məqsədlərlə istifadə olunması rəqəmsal təhlükəsizlik üçün ciddi risklər formalaşdıra bilər.
Qeytsin açıqlaması süni intellektin inkişafı ilə yanaşı, ondan sui-istifadənin qarşısının alınması və kibertəhlükəsizlik tədbirlərinin gücləndirilməsi məsələlərini də gündəmə gətirir.