Çinin aparıcı elektromobil istehsalçılarından biri olan Xpeng, Almaniyanın avtomobil nəhəngi Volkswagen-ə məxsus Avropada yerləşən istehsal zavodunu satın almaq üçün danışıqlar aparır.
GDP xəbər verir ki,bu barədə Financial Times nəşri məlumat yayıb. RTRS agentliyinin 2025-ci ilin yanvar ayına istinadən verdiyi məlumata görə, Çinli avtomobil istehsalçıları bağlanma təhlükəsi ilə üzləşən Almaniya avtozavodlarına yaxından baxır və xüsusilə Volkswagen-in Avropadakı istehsal sahələri ilə maraqlanırlar.
Xpeng-in bu addımı, Çinin qlobal avtomobil bazarında, xüsusən də Avropada mövqeyini gücləndirmək strategiyasının bir hissəsi kimi dəyərləndirilir. Eyni gündə açıqlanan digər bir məlumata görə, çətin dövrlərlə üzləşən digər Alman avtomobil nəhəngi Mercedes-Benz, Berlindəki bütün satış salonlarını kanadalı bir sahibkara satıb. Bu addım, Almaniyanın aparıcı avtomobil markalarının qarşılaşdığı iqtisadi çətinliklərin və struktur dəyişikliklərinin bariz nümunəsi kimi qəbul edilir.
Ekspertlər qeyd edirlər ki, Avropanın ənənəvi avtomobil istehsalçıları enerji böhranı, artan istehsal xərcləri və Çin istehsalı elektromobillərlə rəqabət səbəbindən çətin anlar yaşayır. Bu vəziyyət, Çinli istehsalçılara Avropada istehsal gücü əldə etmək üçün strateji imkan yaradır.