Birbank Private beynəlxalq səviyyədə nüfuzlu “Best Private Bank in Azerbaijan” (“Azərbaycanda ən yaxşı özəl bank”) mükafatına layiq görülüb. Bununla da bank “Global Private Banking Awards 2026” çərçivəsində bu mükafatı qazanan ilk Azərbaycan bankı olub.
GDP xəbər verir ki, bu barədə Bir Ecosystem-in baş icraçı direktoru Fərid Hüseynov məlumat verib.
Onun sözlərinə görə, mükafat Böyük Britaniyanın “Financial Times Group”una daxil olan “PWM” və “The Banker” nəşrləri tərəfindən təqdim edilib.
Fərid Hüseynov bildirib ki, bu uğur Birbank Private-ın özəl bankçılıq sahəsində həyata keçirdiyi fəaliyyətin beynəlxalq səviyyədə qiymətləndirilməsi baxımından xüsusi əhəmiyyət daşıyır.
O qeyd edib ki, bankın əsas məqsədi yalnız yüksək səviyyəli premium xidmətlər göstərmək deyil, həm də ölkə iqtisadiyyatının inkişafına töhfə verən sahibkarlar və biznes liderləri üçün şəxsi və korporativ maliyyə məsələlərində etibarlı tərəfdaş olmaqdır.
Birbank Private-ın idarə etdiyi aktivlər iki dəfədən çox artıb
Fərid Hüseynov bankın fəaliyyət göstəricilərinə də toxunub. Onun açıqlamasına əsasən, son iki ildə Birbank Private-ın idarə etdiyi aktivlərin həcmi iki dəfədən çox artıb.
Bununla yanaşı, 2025-ci ildə bankın müştəri bazası 71,8 faiz genişlənib.
Baş icraçı direktor bildirib ki, əldə olunan nəticələr müştərilərin banka etimadını nümayiş etdirir.
Fərid Hüseynov beynəlxalq mükafatın qazanılmasını komandanın əzmi və birgə əməyinin nəticəsi kimi qiymətləndirərək bu uğurda əməyi olan əməkdaşlara və banka etimad göstərən tərəfdaşlara təşəkkür edib.

