Səudiyyə Ərəbistanı, Küveyt, Qətər və Misir enerji sektorunda əməkdaşlığı genişləndirmək üçün mühüm addım atıblar. Dörd ölkə neft, qaz və neft-kimya sənayesində birgə fəaliyyəti nəzərdə tutan memorandum imzalayıb.
GDP xəbər verir ki, razılaşmanın ən diqqətçəkən məqamlarından biri enerji resurslarının nəqli və ixracı üçün ortaq boru kəmərlərinin tikintisi imkanlarının araşdırılmasıdır.
Təşəbbüsün reallaşması Yaxın Şərqin enerji xəritəsində mühüm dəyişikliklərə səbəb ola bilər. Yeni boru kəmərləri mövcud ixrac marşrutlarına alternativ yaradaraq tranzit risklərini azalda və enerji təchizatının şaxələndirilməsinə imkan verə bilər.
Bu əməkdaşlıqda Misir xüsusi strateji əhəmiyyət daşıyır. Süveyş kanalı, Aralıq dənizi limanları və mayeləşdirilmiş təbii qaz infrastrukturu ölkəni Avropa enerji bazarına çıxış üçün mühüm logistika mərkəzinə çevirir.
Bununla belə, imzalanan memorandum hələlik hüquqi öhdəlik yaradan müqavilə deyil. Layihələrin həyata keçirilməsi üçün konkret investisiya qərarları, texniki planlar və icra müddətləri müəyyənləşdirilməlidir.