Neft ixrac edən ölkələr karteli avqust ayında gündəlik hasilatı 188 min barel artırmaq barədə prinsipial razılığa gəlib.
GDP xəbər verir ki, bu qərar qlobal bazarda yüksək qiymətlər və iri istehlakçı ölkələrin, xüsusilə də ABŞ-ın təzyiqi fonunda verilib. Kartel üzvləri kvotaların növbəti artımını təsdiqləsə də, artımın həcmi olduqca məhduddur – bu, dünya üzrə ümumi neft tələbinin cəmi 0,2 faizindən az hissəsini təşkil edir. Yəni bazar bu artımdan əhəmiyyətli təklif artımı gözləməməlidir.
Ekspertlər qeyd edir ki, bu addım daha çox psixoloji siqnal rolunu oynayır. OPEC+ bir tərəfdən qiymətlər üzərində mövcud nəzarəti saxlayır, digər tərəfdən isə qızğın bazara bir qədər “nəfəs almaq” üçün yer verir. Bu, satıcıların və alıcıların mövqelərini tarazlaşdırmaq cəhdi kimi dəyərləndirilir. Neftin əsas etalon markalarından biri olan Brent neftinin qiymətinə gəldikdə, analitiklər bu qərarın uzunmüddətli yüksəliş trendini qıra bilməyəcəyini bildirirlər. Proqnozlara görə, bazarda daha çox mənfəətin reallaşdırılması (fiksasiya) prosesi baş verə bilər, lakin bu, qiymətlərin kəskin enişinə səbəb olmayacaq.
OPEC+-ın bu qərarı gələcək aylarda tələb-təklif balansını qorumaq baxımından mühüm addım olsa da, qlobal neft bazarında ciddi dəyişiklik yaratmaq iqtidarında deyil. İndi bütün gözlər kartelin növbəti iclasına və istehlakçı ölkələrin mümkün cavab reaksiyalarına yönəlib.