Aqrar Subsidiya Şurasının qərarına əsasən, 2023-cü ilin sentyabrın 1-dən 2025-ci il mayın 31-dək salınacaq üzüm bağları üçün fermerlərə hər hektar üçün 8000 manat əkin subsidiyası ödəniləcək.
GDP xəbər verir ki, bu subsidiyadan yararlanmaq üçün Quba-Xaçmaz iqtisadi rayonu istisna olmaqla, digər rayonlarda süfrə üzüm sortlarından, Qarabağ, Şərqi Zəngəzur, Şəki-Zaqatala, Gəncə-Daşkəsən, Dağlıq Şirvan və Qazax-Tovuz iqtisadi rayonlarında isə texniki üzüm sortlarından olan tinglərin əkilməsi və sahənin azı 2 hektar olması tələb olunur. Həmçinin, bu bağların “Aqrar sığorta haqqında” Azərbaycan Respublikasının Qanununa müvafiq olaraq sığortalanmış olması da vacibdir.
Bundan əlavə, Aqrar Subsidiya Şurası 2021-ci ilin sentyabrından bu ilin sentyabrına kimi salınmış üzüm bağları üçün hər hektar üzrə 700 manat əkin subsidiyasının ödəniləcəyini də açıqlayıb. 2021-ci ilin sentyabrından əvvəlki tarixlərdə salınmış bağlara görə isə fermerlərə hər hektara 250 manat subsidiya veriləcək.
Yeni üzüm bağlarının salınmasının subsidiyalaşdırılması, fermerlərin bağların salınmasına çəkdiyi xərcin bir hissəsinin dövlət tərəfindən qarşılanması deməkdir. Bu dövlət dəstəyi mexanizmi, ölkədə üzüm bağlarının sahəsinin genişlənməsinə əhəmiyyətli təsir göstərəcək. Üzümçülüyün inkişafı, həmçinin kənd təsərrüfatının diversifikasiyasına və iqtisadiyyatın güclənməsinə də müsbət təsir edəcək.