BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Kiçik və Orta Biznesin İnkişafı Agentliyinin (KOBİA) təşkilatçılığı ilə “KOB-ların yaşıl iqtisadiyyatda rolu” mövzusunda panel müzakirə keçirilib.
“Yaşıl zona”da təşkil edilən tədbirdə rəsmi şəxslər, beynəlxalq təşkilatların nümayəndələri, iş adamları və “yaşıl iqtisadiyyat” sahəsində fəaliyyət göstərən startaplar iştirak ediblər.
Paneldə İtaliya-Azərbaycan Ticarət Palatasının prezidenti Manuela Traldi, KOBİA-nın İdarə Heyətinin sədri Orxan Məmmədov, BMT-nin Cənub-Cənub Əməkdaşlıq Ofisinin direktoru Dima Əl-Xatib və digər yüksək səviyyəli qonaqlar çıxış edərək KOB-ların dünya iqtisadiyyatında və məşğulluqdakı rolundan, iqlim dəyişiklikləri ilə mübarizədəki əhəmiyyətindən danışıblar.
Tədbirdə KOB-ların yaşıl transformasiyasının qlobal və milli səviyyədə birgə əməkdaşlıqla mümkün olduğu vurğulanıb. İştirakçılar KOBİA-nın təşəbbüsü olan “KOB-ların yaşıl iqlim keçidi üçün Bakı Koalisiyası Bəyannaməsi”nə qoşulmağa dəvət ediliblər. Artıq Beynəlxalq Ticarət Mərkəzi, Braziliyanın SEBRAE təşkilatı və BMT-nin iqlim dəyişikliyi üzrə yüksək səviyyəli çempionu Nigar Arpadarai bəyannaməyə qoşulublar.
Tədbir çərçivəsində Harvard Universitetinin “Growth Lab” Beynəlxalq İnkişaf Mərkəzinin baş tədqiqat meneceri Tim Çeston İqtisadiyyat Nazirliyi ilə birgə hazırladıqları qlobal “Yaşıl artım portalı”nı təqdim edib.
Panel müzakirədə həmçinin yaşıl keçidin KOB-lar üçün faydası, ətraf mühitə biznesin məsuliyyətli yanaşması, iqlim maliyyələşdirilməsi və yaşıl bizneslərin yaradılması üçün sahibkarların ehtiyacları barədə fikir mübadiləsi aparılıb.