SOCAR-ın 2024-cü ildə ödəmədiyi və 2025-ci ildə ödəyəcəyi dividend məbləğlərinin cəmi 662 milyon manata çatacaq.
Hesablama Palatasının “Azərbaycan Respublikasının 2025-ci il dövlət büdcəsi haqqında” qanun layihəsinə rəyində bildirilir ki, 2024-cü ildə dövlət qeyri-maliyyə təşkilatlarından alınacaq 408,0 milyon manat dividend ödənişi yalnız Azərbaycan Respublikası Dövlət Neft Şirkəti (SOCAR) üzrə nəzərdə tutulub. Lakin həmin dövr ərzində SOCAR tərəfindən bu məbləğin ödənilməsi təmin edilməyib.
Eyni zamanda, 2023-cü ildə də SOCAR üzrə 200,0 milyon manat dividend ödənişi nəzərdə tutulsa da, ödənilməyib.
Buna baxmayaraq, 2025-ci ilin büdcə layihəsində SOCAR-dan alınacaq dividendin məbləği 54,0 milyon manat artırılaraq 462,0 milyon manata çatdırılıb.
Beləliklə, SOCAR-ın 2024-cü ildə ödəmədiyi 408,0 milyon manat və 2025-ci ildə ödəyəcəyi 254,0 milyon manat (462,0 milyon – 408,0 milyon) dividend məbləği toplamda 662 milyon manat təşkil edir.