Azərbaycanın Rəqəmsal İnkişaf və Nəqliyyat naziri Rəşad Nəbiyev COP29 çərçivəsində keçirilən mətbuat açıqlamasında Bakı şəhərinin yaşıl nəqliyyat transformasiyası haqqında məlumat verib.
Nazirin sözlərinə görə, Azərbaycan hökuməti 2030-cu ilə qədər Bakı şəhərinin mobillik transformasiyası proqramını həyata keçirməyə başlayıb. Proqramın əsas məqsədi hər aktiv mobil vətəndaş üçün iqlim və nəqliyyatla bağlı karbon emissiyalarını ildə 0.6 metr/tona endirməkdir.
Proqramın əsas hədəfləri aşağıdakılardır:
– 100 km mikrohərəkətlilik zolaqlarının yaradılması (30 km-dən çox hissəsi artıq istifadədədir)
– İctimai nəqliyyatın əhatə dairəsinin əhalinin 90%-nə çatdırılması
– 2030-cu ilə qədər bütün avtobusların elektrik avtobusları ilə əvəz edilməsi (160 elektrik avtobus artıq əlavə edilib)
Nəbiyev qeyd edib ki, transformasiyanın əsasında innovasiya və data-əsaslı anlayışlar dayanır. Qısa müddətdə Bakı şəhərinin rəqəmsal əkizi (digital twin) yaradılıb və bütün fəaliyyətlər bu rəqəmsal əkizə əsaslanır.
Nazir həmçinin, Dayanıqlı Rəqəmsal Orta Dəhliz üzrə keçiriləcək dəyirmi masadan da bəhs edib. O, dəhliz çərçivəsində rəqəmsallaşma və sinxronizasiyaya böyük diqqət yetiriləcəyini və son illərdə dəhlizin effektivliyinin artırılması istiqamətində görülən işlərin hər bir ölkənin və ümumi hədəflərə çatmaqda effektiv olduğunu vurğulayıb.