2024-cü il 28 iyun tarixində Azərbaycan Respublikasının Torpaq Məcəlləsində dəyişikliklər edilməsi haqqında qanuna əsasən kənd təsərrüfatı təyinatlı torpaqlarda yalnız kənd təsərrüfatı məhsullarının istehsalı və emalı məqsədi ilə, habelə işçilərin müvəqqəti yaşaması üçün yaşayış təyinatlı əsaslı tikililər inşa edilə bilər.
GDP xəbər verir ki,İqtisadiyyat Nazirliyi yanında Əmlak Məsələləri Dövlət Xidməti tərəfindən dekabrın 16-da Torpaq Məcəlləsinə edilmiş əlavə və dəyişikliklər barədə brifinqdə məlumat verilib.
Məlimata görə bu tikililər yalnız sahəsi 5 hektardan az olmayan və vahid sərhəd daxilində yerləşən kənd təsərrüfatı təyinatlı torpaq sahələrinin 1 faizinədək hissəsində tikilə bilər. Lakin yay və qış otlaqları, ümumi istifadədə örüş sahələri istisna təşkil edir.
Kənd təsərrüfatı təyinatlı torpaqlarda tikinti-quraşdırma işləri Dövlət Şəhərsalma və Arxitektura Komitəsi və yerli icra hakimiyyəti orqanlarının məlumatlandırılması ilə həyata keçiriləcək. Tikinti işlərinə dair tələblər müvafiq qanunla müəyyən edilib.
Torpaqların kateqoriyalara aid edilməsi, bir kateqoriyadan digərinə keçirilməsi və kateqoriya daxilində məqsədli təyinatının dəyişdirilməsi ilə bağlı müraciətlər birbaşa İqtisadiyyat Nazirliyi yanında Əmlak Məsələləri Dövlət Xidmətinə ediləcək. Bu müraciətlər “vahid pəncərə” prinsipi əsasında elektron qaydada qəbul ediləcək və 2025-ci ilin yanvarın 1-dən qüvvəyə minəcək.
Eyni zamanda, torpaq sahəsinin kateqoriyasının dəyişdirilməsi ilə bağlı müraciətlərə rəy verilməsi prosesi Elektron Hökumət İnformasiya Sistemi vasitəsilə həyata keçiriləcək. Müraciətlərə aid dövlət orqanları 10 iş günü müddətində rəylərini elektron qaydada təqdim etməlidirlər. Əgər müddət ərzində rəy verilməzsə, torpaq sahəsinin kateqoriyasının dəyişdirilməsi aidiyyəti dövlət orqanı ilə razılaşdırılmış hesab ediləcək.
Torpaqların kateqoriyalara aid edilməsi və onların bir kateqoriyadan digərinə keçirilməsi Azərbaycan Respublikasının Prezidenti ilə razılaşdırılmaqla, Azərbaycan Respublikası Nazirlər Kabinetinin qərarı ilə həyata keçiriləcək.
Qeyd edək ki,bu dəyişikliklər 2025-ci ildən qüvvəyə minir.