2024-cü ilin 15 yanvarında Azərbaycan Mərkəzi Bankı “PashaPay” MMC-yə elektron pul təşkilatı kimi müddətsiz lisenziya verib. 2024-cü ilin may ayında “Kapital Bank” ASC tərəfindən “PashaPay” MMC-yə 48,704 milyon manat investisiya yatırılıb və həmin ilin iyun ayında şirkətin nizamnamə kapitalı 18,022 milyon manatdan 40,022 milyon manata yüksəldilib. Şirkətin gəlir və xərcləri, mənfəət göstəriciləri kimi digər maliyyə məlumatları isə ictimaiyyətə açıqlanmayıb.
“PashaPay” MMC-nin 2024-cü ildə “m10” adlı elektron pulqabısı vasitəsilə təqdim etdiyi xidmətlər genişləndirilib. İlin sonuna qədər 180 yeni provayder əlavə edilərək ümumi xidmət təminatçıların sayı 267-yə çatdırılıb. Eyni zamanda, “Bakıkart” inteqrasiyası həyata keçirilib ki, bu da istifadəçilərə ictimai nəqliyyatda rəqəmsal ödəniş imkanlarını genişləndirmək imkanı yaradıb. “PashaPay” MMC, Sandbox rejimi çərçivəsində təqdim olunan texnoloji həlləri uğurla test edərək, yaxın aylarda bazara yeni xidmətlər çıxarmağı planlaşdırır. Belə ki, “PashaPay” MMC-nin kriptovalyuta ilə əməliyyatlar aparmağa imkan verən yeni platforması Azərbaycan Mərkəzi Bankının təqdim etdiyi Sandbox rejimi çərçivəsində fəaliyyət göstərməyə başlayıb. Bu addım şirkətə öz maliyyə texnologiyalarını real bazar şəraitinə uyğun şəkildə sınaqdan keçirmək və yeni innovativ xidmətləri inkişaf etdirmək imkanı verir.
Bundan əlavə, “m10” tətbiqi vasitəsilə 20,000 AZN-dək rəqəmsal kredit almaq imkanı təqdim edilib ki, bu da ölkənin rəqəmsal kredit sistemi üçün mühüm yenilik hesab olunur. Umico loyallıq proqramının “m10” ilə tam inteqrasiyası nəticəsində istifadəçilərə daha geniş endirim və bonus imkanları təqdim edilib.
“MilliÖn” terminal şəbəkəsinin inkişafı da diqqətəlayiq olub. 2024-cü il ərzində terminalların sayı 5,200-ə çatdırılıb və bu terminallar vasitəsilə artıq 1,000-dən çox müxtəlif xidmət növü təqdim olunub. Qarabağda ilk terminalların quraşdırılması isə həm iqtisadi dirçəlişə dəstək, həm də maliyyə xidmətlərinin əlçatanlığını artırmaq məqsədi daşıyıb.
“PashaPay” 2024-cü ildə bir çox böyük yerli və beynəlxalq brendlərlə əməkdaşlıq edib. Bunlar arasında “McDonald’s”, “Bazarstore”, “Araz Supermarket”, “Kontakt Home”, “Baku Electronics”, “iSpace” və “Ağ çiçəyim” kimi məşhur adlar yer alır. Bu əməkdaşlıqlar şirkətin müştəri bazasını artırmaqla yanaşı, rəqəmsal ödənişlərin daha geniş istifadəsinə şərait yaradıb.
“PashaPay” 2024-cü ildə Böyük Britaniyanın nüfuzlu “Pan Finance” jurnalı tərəfindən keçirilən sorğu nəticəsində şirkət “Ödəmə xidmətlərinin rəqəmsal transformasiyası – Azərbaycan” nominasiyasında ilin ən yaxşı şirkəti seçilib.
Şirkət sosial məsuliyyət layihələrinə də xüsusi önəm verib. Gənc innovatorların dəstəklənməsi məqsədilə PAŞA Holding-in təşkil etdiyi hakaton çərçivəsində qalib gələn 3 komanda “PashaPay” tərəfindən dəstək alaraq öz layihələrini reallaşdırmaq imkanı əldə edib. Eyni zamanda, Qarabağda yeni xidmət nöqtələrinin açılması sosial və iqtisadi baxımdan mühüm addım kimi qiymətləndirilə bilər.