SOCAR-ın 2024-cü ilin ilk altı ayı üzrə maliyyə göstəricilərinin 2023-cü ilin eyni dövrü ilə müqayisəsinə əsasən, şirkətin ümumi gəlirləri artaraq 42,181 milyon manatdan 45,054 milyon manata çatıb ki, bu da 6.8% və ya 2,873 milyon manatlıq artım deməkdir. Bununla belə, satışların maya dəyəri 10.1% və ya 3,809 milyon manat artaraq 37,538 milyon manatdan 41,347 milyon manata yüksəlib. Bu dəyişiklik ümumi mənfəətin 4,643 milyon manatdan 3,707 milyon manata düşməsi ilə nəticələnib ki, bu da 20.2% və ya 936 milyon manat azalma deməkdir.
Ümumi və inzibati xərclər 2.7% artaraq 928 milyon manatdan 953 milyon manata yüksəlib, sosial xərclər isə 9.7% artaraq 124 milyon manatdan 136 milyon manata çatıb. Bununla yanaşı, paylaşdırma xərcləri 1,163 milyon manatdan 954 milyon manata düşərək 18% və ya 209 milyon manat azalıb.
Əmlak, tikili və avadanlıqların silinməsi üzrə zərər sabit yəni 10 milyon manat səviyyəsində qalıb. Digər tərəfdən, gözlənilən kredit zərərləri (GKZ) üzrə xərclər və kəşfiyyat xərclərin hər birində 1 milyon manatlıq artım qeydə alınıb.
Əməliyyat fəaliyyəti üzrə mənfəət 51.5% azalmış və 2,584 milyon manatdan 1,252 milyon manata düşmüşdür. Sair əməliyyat gəlirləri isə 68.3% azalıb, 492 milyon manatdan 156 milyon manata enib. Bunun əksinə olaraq, maliyyə gəlirləri 304 milyon manatdan 379 milyon manata yüksəlib ki, bu da 24.7% artım deməkdir. Eyni zamanda, maliyyə xərcləri 771 milyon manatdan 1,046 milyon manata çatıb və bu da 35.7% və ya 275 milyon manatlıq artım deməkdir. Xalis monetar mövqe üzrə zərər 62 milyon manatdan 86 milyon manata qalxıb, 38.7% atımın göstərisidir.
Birgə müəssisələrin maliyyə nəticələrindən pay 401 milyon manatdan 504 milyon manata yüksələrək 25.7% artımın göstəricisidir. Mənfəət vergisindən əvvəlki mənfəət 6.1 faiz artımla 1,890 milyon manatdan 2,005 milyon manata yüksəlib. Mənfəət vergisi xərci isə 476 milyon manatdan 460 milyon manata düşərək 3.4% azalıb. Bunun nəticəsində SOCAR-ın dövr üzrə xalis mənfəəti 1,414 milyon manatdan 1,545 milyon manata çatmış və bu da 9.3% və ya 131 milyon manatlıq artımı ifadə edib.
Cari aktivlər 22,933 milyon manatdan 21,953 milyon manata düşərək 4.3% azalıb, lakin uzunmüddətli aktivlər 49,033 milyon manatdan 50,628 milyon manata yüksələrək 3.3% artım nümayiş etdirib. Ümumilikdə, cəmi aktivlər 0,9% artarak, 71,966 milyon manatdan 72,581 milyon manata qalxıb. Cari öhdəliklər cuzi yəni 0,26% artarak 19,571 milyon manatdan 19,622 milyon manata cüzi artıb, uzunmüddətli öhdəliklər isə 17,547 milyon manatdan 16,780 milyon manata düşərək 4.4% azalıb.
SOCAR-ın cəmi kapitalı 34,848 milyon manatdan 36,179 milyon manata yüksələrək 3.8% artıb.
Ümumilikdə, SOCAR-ın 2024-cü ilin ilk 6 ayı üzrə maliyyə göstəricilərində gəlirlərin və xalis mənfəətin artımı müşhidə edilsə də, əməliyyat fəaliyyətindən əldə olunan gəlirdə azalma və bəzi xərclərdə artımlar şirkətin maliyyə effektivliyini artırmaq üçün potensial optimallaşdırmasına ehtiyac olduğuna işarə edir.
Müəllif: Aynur Qəniyeva